လက်ရှိမြန်မာ့ နိုင်ငံရေးကို ကျွန်နော့်အမြင်သဘောထား

ဒေဂု နိုင်ငံရေးလောကမှာ ဒေါ်အောင်ဆန်းစုကြည်ဆိုကေ တချို့နိုင်ငံရေးသမားတိက ကန့်ကွက်လူလည်း ဟိရေပိုင် ထောက်ခံလူလည်းဟိပါရေ။ ဗမာ့နိုင့်ငံရေးအသိုင်းအဝိုင်းကလည်း ထောက်ခံရေလူဟိရေပိုင် ကန့်ကွက်တေလူတိလည်း တွိရပါယင့်။ ဝေဖန်သံတိလည်း ဆူညံနီကတ်ပါရေ။ ဒေနေရာမှ ကျွန်နော့် အမြင်ကို စိချေ တင်ပြပါမယ်။ ပြောရဖို့ဆိုကေ ဒေါ်အောင်ဆန်းစုကြည် နိန်အိမ်အကျယ်ချုပ် ကမထွက်ခင် ပြောခပါ ရေ။ ၂၀၀၈ ဖွဲ့စည်းပုံအခြေခံဥပဒေစော် လုံးဝစက္ကူစုတ်ပါရာလို့ဒေါ်အောင်ဆန်းစုကြည်က ပြောဖူးခပါရေ။ စစ်အာဏာရှင်စနစ်ကြီးစိုးရေးကို မဏ္ဍိုင်ပြုထားရေ ဖွဲ့စည်းပုံရာဖြစ်တေ။ အမေရိကန်ပါဝင် ကမ္ဘာ့နိုင်ငံအသီးသီးကလည်း ယင်းဖွဲ့စည်းပုံကို စက္ကူစုတ်တစ်ခုပိုင် ပြောကတ်ပြီးကေ မထောက်ခံ ခကတ်ပါ။ ယေကေလည်း နအဖ လမ်းပြမြေပုံ (၇) ချက်အတိုင်း စစ်အာဏာရှင်စနစ်ကြီးစိုးရေး၊ မဟာဗမာ လူမျိုးကြီးဝါဒကြီးစိုးရေး၊ စရေအချက်တိကို အခြေခံထားရေ ယင်းသူရို့၏ စတုတ္ထ မဟာဗမာ နိုင်ငံတော်ကို ဖန်တီးဖို့ အကောင်အထည်ဖေါ်ဖို့ အထောက် အကူပြုရေ ဖွဲ့စည်းပုံအခြေခံဥပဒေပါ။
ယင်းဖွဲ့စည်းပုံကို မကြိုက်တေ ဒေါ်အောင်ဆန်းစုကြည်ရေ အဂု ယင်းဖွဲ့စည်းပုံအောက်ကို လားဖို့ ပျင်နီပါရေ။ ဇာဖြစ်လို့ပါလေ။ အကြောင်းတိ အချက်တိ အတွေးအခေါ်တိ အမြင်တိ ဝေဖန်ချက်တိ ဆွေးနွေးချက်တိ အများကြီးဟိလီပါဖို့။ ယင်းဖွဲ့စည်းပုံအောက်ကိုလားကေ ၁၉၉၀ ရွေးကောက်ပွဲစော် သူ့အလိုလို ပျက်ပျယ်လားခပါဗျယ်။ ရွှေဂုံတိုင်ကြေငြာချက်စော်လည်း သူ့အလိုလို စက္ကူဘဝကို ရောက်လားလီပါဖို့။ ဒေရှင့်စော် ဇာဖြစ်လို့ ဒေါ်အောင်ဆန်းစုကြည် ဒေပိုင်လုပ်ရစော်လဲ။ ကျွန်နော့်လေ့လာ ဆန်းစစ်လိုက်တေအခါ။ သူ့ကိုနီအိမ် အကျယ်ချုပ်ကနိန်လွှတ်ပီးစော်က ၂၀၀၉ နိုဝင်ဘာလ ၁၃ ရက်၊ ရွေးကောက်ပွဲပြီးရေနောက်ပိုင်းပါ။ (နအဖလည်း ဒေနေရာမှာ ကကောင်း နိုင်ငံရေးပရိယာယ် ဝပါရေ။ ယင်းပိုင်ဝ လို့လည်း တိုင်းပြည်ကို ဒေပိုင်လုပ်လို့ရနိန်စော်ပါကို။) သူ့အနေနှင့် ဥပဒေဘောင် (နအဖ ချမှတ်ထားရေ ဥပဒေဘောင်) အတွင်းကလှုပ်ရှားဖို့ဆိုကေ၊ အခြေအနေ ကောင်းနိုင်ပါရေ။ နောက်တစ်ခုက သူ့အနေနန့် နောက်တခါထောင်ကျခံလို့ လုံးဝမဖြစ်နိုင်ပါဗျယ်။ နအဖကလည်း သူ့ကို ပါလီမန်ထဲကို အားနန့် ဆွဲခေါ်ရေ ပုံရိပ်ချေတိတွိရပါရေ။ ဒေါ်အောင်ဆန်းစုကြည် ဒေပိုင်လုပ်စော်ရေ တဖက်ကကြည့်ကေ ပြည်သူလုထု ထောက်ခံထားရေ ၁၉၉၀ ရွေးကောက်ပွဲကို လုံးဝမျက်ကွယ်ပြုလားရေပိုင်ကျပါရေ။ ပြည်သူလုထုကို မလေးစားရလည်းရောက်ပါရေ။ ကမ္ဘာမှာ မရှိလောက်တေ ၈၂ % (ရာခိုင်နှုန်း)နန့် ရွေးကောက်ပွဲနိုင်စော်ပါ။ အပြတ်အသတ်နိုင်စော်ပါ။ Landslide ဖြစ်ပါရေ။ ယေကေလည်း သူ့နောက်မှာ ပြည်သူဟိပါရေ။ ဆိုးဆိုးကောင်းကောင်း ပြည်သူလူထု ထောက်ခံမှုကို အပြည်အဝရထားရေ နိုင်ငံရေးခေါင်းဆောင်တစ်ယောက်ပါ။ ကျွန်နော် ဒေပိုင်သူ့ဖက်က ပြောနိန်စော်စော် သူ့ကိုထောက်ခံလို့ လေးစားလို့လို့ မထင်လိုက်ကတ်ပါကေ့။ ideology analysis လုပ်ပြီးကေ ပြောနိန်ခြင်းရာဖြစ်ပါရေ။ ဒေဂုမြန်မာနိုင်ငံပြုပြင်ပြောင်းလဲရေး၊ (Transformation) (Transition to Democracy) ဒီမိုကရေစီ အသွင် ကူးပြောင်းရေးလုပ်စော်မှာ ပြည်ပနိုင်ငံတိက မြန်မာနိုင်ငံကို ချဉ်းကပ်မှုတိ အများကြီး ဟိလာစော်တိ လက်ရှိအချိန်မှာ တွိမြင်လာကတ် ပါရေ။ ဒေရက်ပိုင်း အတွင်းမှာ အမေရိကန် နိုင်ငံခြားရေဝန်ကြီး ဟယ်လာရီကလင်တန် (Hillary Clinton) တောင်မှ မြန်မာနိုင်ငံကို လာပြီးကေ လက်ရှိ ဦးသိန်း အစိုးရဖက်က လူတိနန့်လည်းတွိပြီးကေ NLD ဖက်က ဒေါ်အောင်ဆန်းရို့နန့်လည်း တွိဖြစ်ကတ်ပါရေ။ နောက်တိုင်းရင်းသားခေါင်းဆောင်တွိကတ်ပါရေ။ ဟယ်လာရီကလင်တန်က ပွင့်လင်းမြင်သာရေ ပြုပြင်ပြောင်းလဲရေးကို မြင်ချင်ရေလို့ပြောပါရေ။ အဓိက အမေရိကန်က မြန်မာနိုင်ငံမှာ ထားရေ ဝှက်ဖဲလက်နက်တစ်ခုဖြစ်တေ ပိတ်ဆို့မှုတိကို (Sanction) လက်ကိုင်ထားပနာလာခြင်းဖြစ်ပါရေ။ ယင်းစော်ကိုလည်း စိုင်းဇားပီးမေလို့လည်းပြောလားခပါယင့်။ ကျွန်နော်ရို့ ရခိုင်အမျိုးသား တိုးတက်ရေးပါတီက (RNDP- Rakhine National Development Party) ဒေါက်တာအေးမောင်ရို့နန့် လည်း တွိဆုံခကတ်ပါရေလို့ကြားသိရပါရေ။ ကျွန်နော့်အမြင်က မြန်မာနိုင်ငံရေ ဒီမိုကရေစီဖက်ကို ၅၀%ရာခိုင်နှုန်းလောက် ပြောင်းလဲလားနိုင်ပါရေ။ ယေကေလည်း တိုင်းရင်းသား အခွင့်အရေးအတွက် လမ်းစမမြင်ပါသိမ့်။ ဟယ်လာရီကလင်တန် နန့် ဒေါ်အောင်ဆန်းစုကြည်ကြားမှာ တစ်ခုခုတော့ဟိလီပါဖို့။ ယင်းစော်ကို ကျွန်နော်ရို့လည်း မသိနိုင်ပါ။ ယေပြီးကေ အမေရိကန်သမ္မတ ဘရက် အိုဘားမား (Barack Obama) နန့် ဒေါ်အောင်ဆန်းစုကြည်နန့်လည်း ဖုန်းပြောဖြစ်ကတ်ပါရေ။ အမေရိကန်က မြန်မာနိုင်ငံအပေါ်မှာ သူ့မူဝါဒကတော့ ထိုင်းနိုင်ငံပိုင် သူ့လက်အောက်ခံနိုင်ငံအဖြစ် သွတ်သွင်းဖို့ပိုင် ဖြစ်နီပါရေ။ နိုင်ငံရေးပထဝီ (Geopolitics) အနေအထားရ မြန်မာနိုင်ငံစော်လည် အမေရိကန်အတွက် အရေးပါရေ နေရာတစ်ခုမှာ ပါရေ။ ဒေနိန်ရာမှာ တိုင်းရင်းသားအခွင့်အရေးဆိုလို ယင်းအခွင့်အရေးကို စိချေပြောချင်ပါရေ။ ဒေတိုင်းရင်းသား အခွင့်အရေးယေ အဂုကပင်ဆုံးရှုံးနိန်စော်မဟုတ်ပါ။ လွန်ခရေ ၁၉၄၈ လွတ်လပ်ရေးရစခါကပင် ဆုံးရှုံးနိန်စော်ဖြစ်ပါရေ။ ဗိုလ်ချုပ်အောင်ဆန်းရေ တောင်ထက်မှာနိန်ရေလူတိနန့် မြေပြန့်လွင်ပြင်မှာနိန်ရေ လူတိကို ပေါင်းပြီးကေ လွတ်လပ်ရေးယူဖို့လို့ပြောခပါရေ။ “မင်းရို့တိ ငါရို့နန့် ဆယ်နှစ်အတူတူ လက်တွဲပနာနိန်ကြည့် ဆယ်နှစ်အတူတူ နိန်လို့မှ မင်းရို့မကြိုက်ဆိုကေ ယင်းခါ မင်းရို့သဘော မင်းရို့ ဆန္ဒအလျောက်ခွဲထွက် ချင်ကေ ခွဲထွက်လို့ရရေ ဆိုရေသဘော” ကို ဗိုလ်ချုပ်အောင်ဆန်းပြောဖူးခစော်ကို အားလုံးသူရို့ သိကတ်ဖို့ထင်ပါရေ။ ပင်လုံညီလာခံတစ်ခုပြုလုပ်ပြီးကေ အားလုံးသူပေါင်းလို့ လွတ်လပ်ရေးယူခစော် အားလုံးအသိဖြစ်ပါရေ။ ဒေစော် ဗိုလ်ချုပ်အောင်ဆန်း နိုင်ငံရေးကွက်ကျော်စားလား စော်လို့မြင်ပါရေ။ ဇာဖြစ်လို့လဲဆိုကေ ဗမာလူမျိုးဖက်က အောင်ဆန်းတယောက်တည်း အာမခံပနာ လုပ်လားခရေ ကိစ္စဖြစ်နိန်ရေအတွက်ဖြစ်ပါရေ။ တကယ်လို့ ပင်လုံညီလာခံ အရဆိုကေ ကျွန်နော် ရို့ ရခိုင်လူမျိုး အနေနန့် ခွဲထွက်ပိုင်ခွင့်ဟိဖို့ထင်ပါရေ။ ယင်းပင်လုံညီလာခံမှာ ပါခရေအဓိက လူမျိုးတိက တော့ခါ ကချင်၊ချင်းနှင့် ရှမ်းရို့ဖြိုက်ပါရေ။ ရခိုင်ဖက်တော့ခါ ဦးအောင်ဇံဝေရို့က လေ့လာသူအဖြစ် ယင်းညီလာခံကို တက်ရောက်ခကတ်ပါရေ။ ပင်လုံညီလာခံ၏ အဓိက အနှစ်သာရတော့ခါ ဆန္ဒအလျောက် ခွဲထွက်ပိုင်ခွင့်၊ ပူးပေါင်းပိုင်ခွင့်ရို့ဖြစ်ပါရေ။ ခွဲထွက်ခွင့်နန့် ပူးပေါင်းခွင့်ကိစ္စနန့်ပတ်သက်လို့ပြောချင်စော်က ၁၉၇၄ ဖွဲ့စည်းပုံဥပဒေကို အသေအချာလေ့လာကေ လုံးဝ ခွဲထွက်လို့မရအောင်လုပ်ထားပါရေ။ ၁၉၄၇ ဖွဲ့စည်းပုံအခြေခံဥပဒေမှာ ခွဲထွက်ပိုင်ခွင့်နန့်ပတ်သက်လို့ အခန်း ၁၀ မှာ အကျယ်တဝင့်ရှင်းပြထားပါရေ။ ဗိုလ်ချုပ်အောင်ဆန်းရေ ယင်းခါကပင် လွတ်လပ်ရေးယူခလို့ရပါယာ။ ယေကေလည်း သူရေ နောက်တခြားတိုင်းရင်းသားတိကို စည်းရုံးဖို့.. တောင်မှာနိန်ရေလူတိနန့် မြေပြန့်ဒေသမှာ နိန်ရေလူတိနန့် တပေါင်းတစည်းတည်းယူဖို့ ဆိုရေအကြောင်းပြချက်နန့် မြန်မာနိုင်ငံ၏ လွတ်လပ်ရေးရှေ့ပြီး အောင်ဆန်း-အက်တလီစာချုပ်ကိုချုပ်ဆိုပြီးနာမြန်မာနိုင်ငံကိုပြန်လာခပါရေ။ မြန်မာနိုင်ငံကိုပြန်လာရေနောက်ပိုင်း ၁၉၄၇ ဇူလိုင်လ ၁၉ ရက်နိန်မှာ လုပ်ကြံခံလိုက်ရပါရေ။ ဒေနိန်ရာမှာ ကျွန်နော်တစ်ခုပြောချင်ပါရေ။ အင်္ဂလိပ်တိက ရခိုင်ရို့ လွတ်လပ်ရေးပီးရေအခါ ပါကိစ္စတန်နန့် ပေါင်းပီးဖို့လား၊ အိန္ဒိယ နန့်ပေါင်းပီးဖို့လား၊ ဗမာနန့်ပေါင်းပီးဖို့လားဆိုစော်ကို ထည့်စိုင်းစားလီခဖို့ ထင်ပါရေ။ မဟုတ်ကေ အင်္ဂလိပ်လက်အောက်မှာ ဒေနိန့်ထက်ထိ ရှိနိန်ဖို့လားဆိုစော်ကိုလည်း စိုင်းဇားစရာပါ။ ဗိုလ်ချုပ်အောင်ဆန်းရေ နိုင်ငံရေး အမြတ်ထုတ်လားခစော်ပါ။ သူသီကေ ပြီးယာဆိုရေ ပုံစံမျိုးနန့် လုပ်လားခစော်လည်း ဖြစ်ကောင်းဖြစ်နိုင်ပါရေ။ ပြီးကေ သူက ပြောကေ ပြောရေ အတိုင်းလုပ်ပါရေ။ ယင်းစော်က သူ့အားနည်းချက်ဆိုရေပိုင် အားသာချက်တစ်ခုပါ။ သူဟိခကေလည်း တိုင်းပြည်တမျိုးတဖုံဟိပါဖို့။ ရခိုင်ပြည်လည်း အိန္ဒိယ နန့်ပေါင်းပြီးလွတ်လပ်ရေးယူခဖို့ဆိုကေလည်း ဒေနိန့်အချိန်မှာ အိန္ဒိယထဲက ပြည်နယ်ချေတစ်ခုအဆင့်လောက်ရှိပါဖို့။ ပါကိစ္စတန်နန့်ရာ ပေါင်းဖို့ဆိုကေလည်း အားလုံးရခိုင်သားတိ အလ္လာကို ရှိခိုးလို့ဟိပါဖို့။ ဗမာနန့်ပေါင်းပြီးကေ လွတ်လပ်ရေး ယူခစော် ကောင်းစော်တိဟိပိုင် ဆိုးစော်တိလည်းဟိပါရေ။ ဗိုလ်ချုပ်အောင်ဆန်းကို ကျေးဇူးတင်ရဖို့လိုလို ဖြိုက်နိန်ပါကာ။ ဒေဂုလက်ရှိဖြစ်ပေါ်နိန်ရေ နိုင်ငံရေးဖြစ်စဉ်တိမှာ ဒေါ်အောင်ဆန်းစုကြည်ကို အားလုံးဗမာတိက ကြိုက်ကြိုက် မကြိုက်ကြိုက် အားလုံး ဝိုင်းရံပီးကတ်ပါရေ။ ယင်းစော် မဟာဗမာလူမျိုးကြီးရို့၏ ကောင်းရေ အချက်ချေတိပါ။ ကိုယ့်လူကြီးကို ကိုယ်ရို့အားလုံးက ဝိုင်းရံပီးကတ်ပါရေ။ ဒေါ်အောင်ဆန်းစုကြည်ရေ သူအမှားတိလုပ်ခပါဖို့။ ယေကေလည်း အားလုံးက သူ့ကိုထောက်ခံပြီးကေ ဝိုင်းရံပီးကတ်ပါရေ။ သူစော် ဗိုလ်ချုပ်အောင်ဆန်း အရှိန်အဝါတိလည်းပါပါဖို့။ နိုင်ငံခြားမှာ ပညာသင်ဘနာ နိုင်ငံခြားသားကို ယူထားရေ ဗမာ အမျိုးသမီးတယောက်ပါ။ ယေကေလည်း တိုင်းပြည်အတွက် လုပ်တေအခါ အားလုံးက သူ့အနစ် အနာခံမှုတိကို အသိအမှတ်ပြုပြီးကေ ဝိုင်းရံပီးကတ်ပါရေ။ နောက်တစ်ခုက ဒေါ်အောင်ဆန်းစုကြည်၏ တိုင်းရင်းသားအပေါ်မှာထားရေ ပေါ်လစီပါ။ မြန်မာနိုင်ငံပြုပြင် ပြောင်းလဲဖို့လုပ်တေဆိုကေ တိုင်းရင်းသားအခန်းကဏ္ဍကို ပိုက်ပယ်ထားလို့မရပါ။ ပြီးကေ သုံးပွင့်ဆိုင် ဆွေးနွေးဖို့လိုပါရေ။ ဇာပင်ဖြစ်ဖြစ် သူ့အနေနန့် လွတ်တော်ထဲကို လုံးဝဝင်ပါဖို့။ နောက်လာဖို့ရွေးကောက်ပွဲစော် သူ့အတွက် လုံးဝ နိုင်ကွက်လို့မြင်ပါရေ။ နိုင်ငံတကာစောင့်ကြည့်မှုအရ ဒေါ်အောင်ဆန်းစုကြည့်ကို ဒေပိုင်လုပ်ခွင့် ပီးလိုက်တေအတွက် နိုင်ငံတကာက ထောက်ပံ့မှုတိ အများကြီးရပါဖို့။ ယင်းစော်လည်း နိုင်ငံရေး လှည့်ကွက်တစ်ခုပါ။ နအဖ ကကောင်းလည်ပါရေ။ အဂုအပြုသဘောဆောင် တွေ့ဆုံဆွေးနွေးမှု တိ၊ အပစ်အခတ်ရပ်စဲမှုတိ လုပ်လာစော် လည်းတွိရပါရေ။ တဖက်က ယင်းပိုင်လုပ်တေပိုင်၊ နောက်တဖက်ကလည်း ထိုးစစ်တိ ဆင်နိန်စော်ကိုတွိ့ရပါရေ။ အဂုဆိုကေ RCSS (Restoration Council of Shan State) နန့်လည်း သဘောတူပြီးပါယာ။ ဝနန့်လည်း သဘောတူပြီးပါယာ။ ဒေပိုင် သဘောတူ လက်မှတ်ထိုးစော်တောင်မှ ထူးခြားချက်တစ်ခု ဝပြည်သွေးစည်းရေးပါတီသည် တရုတ်နိုင်ငံနှင့်လွတ်လပ်စွာ ကုန်သွယ်ဆက်ဆံပိုင်ခွင့် ဆိုရေအချက်တစ်ခုပါ။ လက်မှတ်ထိုးစော်တောင်မှ ခွဲခြားဆက်ဆံမှုတိ လုပ်နီစော်တွိ့ရပါရေ။ ယင်းပိုင် ဆိုကေ ဒေကောင်တိကို ယုံရဖို့လား။ ဒေအစိုးရရေ နိုင်ငံတကာမှာ ကကောင်းမျက်နှာငယ်နီရ ပါရေ။ ယင်းစော်အတွက် သူ့အဖတ်ဆယ်နီစော်ပါ။ နောက်တစ်ခုက ဧရာဝတီ။ ပြည်သူ့အသံတိကြောင့် နအဖ လုပ်ဖို့စီစိုင်ထားရေ ဆည်ကြီး (၇) ခုထဲက အကြီးဆုံးစီမံကိန်းကို လောလောဆယ်ရပ်တန့်ထားပါရေ။ ဒေဧရာဝတီ ကိစ္စစော် လုံးဝ ပြီးဆုံးလားစော် မဟုတ်ပါသိမ့်။ လောလောဆယ်တန့်ထားစော်ပါ။ ပြည့်သူ့အသံတိကို လေးစားရေအနေနန့် နိုင်ငံတကာမှာ မျက်နှာပန်းလှအောင် ကလိန်ကျမှုတစ်ခုပါ။ ဒေါ်အောင်ဆန်းစုကြည်အနေနန့် သူလွတ်တော်ထဲကို ဝင်လာကေ ပြုပြင်ပြောင်းလဲမှုတိ လုပ်ဖို့စော်ကို တွိ့မြင်နိန်ရပါရေ။ ဖွဲ့စည်းပုံကိုပြောင်းဖို့။ နောက်လွတ်တော်ထဲမှာ သဘောထားကွဲလွဲလာကတ်တေအခါ uprising တိဖြစ်လာနိုင်ပါရေ။ သူက ယင်းစော်ကို ပစ်မှတ်ထားပုံရပါရေ။ မြန်မာနိုင်ငံအနေနန့် ဒီမိုကရေစီဖက်ကို လားနီရေစော်ရေ အယင်က အင်ဒိုနီရှားပြုပြင်ပြောင်းလဲမှုနန့်စိချေ တူပါရေ။ လားစော်ကတော့ လိပ်ပိုင်လားပါရေ။ ပြောင်းလဲလာစော်တော့ ပြောင်းလဲလာပါယာ။ လက်ရှိ အခြေအနေအရ မြန်မာနိုင်ငံရေ ဒီမိုကရေစီဖက်သို့ လုံးဝမလားလို့မရပါရာ။ ယင်းအတွက်နန့် လားနိန်ရေခရီးမှာ ကျွန်နော် ရို့ရခိုင်သားတိအနေနန့် ရသလောက် ကိုယ့်အိတ်ထဲကို ထည့်ပနာ နောက်ဆုံး ကျွန်နော်ရို့လိုချင်ရေ ပန်းတိုင်ကို လျှောက်လှမ်းနိုင်ကတ်ပါစီလို့ ဆန္ဒပြုယင်း။ (မြောက်ဦးနန်းတော်ကို တရက်တည်းနန့် ဆောက်လို့ပြီးခစော် မဟုတ်ပါ)
ခိုင်မင်းညို
မှတ်ချက်။ ။ နောက်အပိုင်းတိ အပိုင်းတိ ဆက်လို့ရွီးဖို့ကျန်ပါသိမ့်ရေ။