နိုင်ငံတိုင်း၊ နိုင်ငံတိုင်းနန့် လူမျိုးတိုင်း လူမျိုးတိုင်းမှာ သူ့ရို့တိအတွက် မမိန့်နိုင်ရေနိ ဆိုစော်ဟိပါရေ။ ဥပမာ - လွှတ်လပ်ရေးနိအရေးကြီးရေပိုင် အမျိုးသားနိဆိုစော်လည်း အရေးကြီးပါရေ။ အမျိုးသားနိကို သတ်မှတ်တေအခါ ယင်းလူမျိုး၊ ယင်းနိုင်ငံမှာ အအောင်မြင်ဆုံး၊ အစည်းရုံးဆုံးနန့် အတောက်ပဆုံးနိကို သတ်မှတ်ရပါရေ။ ယင်းပိုင်ဆိုက ကျနော်ရို့ရခိုင်မှာလည်း အမျိုးသားနိ အေနိထိ သတ်မှတ်လို့ မရနိုင်စော်၊ ဇာဖြိုက်လို့လည်း။ အေကိစ္စကို ပြောလိုက်တိုင်းမှာ ရခိုင်ပညာဟိတိ၊ ပညာတတ်တိ၊ ရခိုင်မျိုးချစ်တိ၊ ခေါင်းစားရရေ အရာတခုပါ။ ဇာဖြိုက်လို့ဆိုကေ ရခိုင်သမိုင်းတလျှောက်မှာ အောင်မြင်စည်ပင်ခရေ နိတိနန့် လှပရေ သမိုင်းတလျှောက်ကို ပိုင်ဆိုင်ထားခရေအခါ အအောင်မြင်ဆုံးနိကို ရွေးထုတ်ရခက်ပါရေ။
ရခိုင်ဘုရင် စန္ဒသူရိမင်းလက်ထက်က ဗုဒ္ဓဘုရားရခိုင်ပြည်ကို ကြွရောက်လာပြီးကေ မဟာမြတ်မုနိဘုရားကို တည်ထောင်ခရေနိကလည်း ရခိုင်သမိုင်းတခုမှာ လှပခရေဆိုကေ၊ မာရယုမင်း ဓည၀တီခေတ်ကို စတင်ခရေဆိုကေ၀ါ ဆိုကေ အမြင်နှစ်မျိုးလောက်စီထွက်လာပါရေ။ ယင်းပိုင်ဖြိုက်လို့ RNDP စတင်လာရေ လောက်ကပင် အေကိစ္စကို ကြောငြာချက် တစောင်ထုတ်ပြီးကေ ပြည်သူ့လူထုတိပါးက အမြင်နန့် ပီးစာတိကိုဖွင့်ပြီးကေလုပ်ခရေပါရေ။ RNDP ကလည်း ပီးစာတိကို အခုထိအောင် ဖွင့်ထား လက်ခံနီရေလို့လည်း RNDP ပြောရေးဆိုခွင့်ဟိရေလူတယောက်က လေးဝတီကို ပြောပြပါရေ။ ကြေငြာချက်ထဲမှာလည်း “ရခိုင်အမျိုးသးနိ” သတ်မှတ်ဖို့အတွက် ပြည်တွင်းပြည်ပ ရခိုင်ပညာရှင်တိ၊ ရခိုင်နိုငံရေးသမားတိ၊ သမိုင်းပညာရှင်တိ ၀ိုင်းဝန်ပါဝင်ကတ်ဖို့အတွက် ကြေငြာချက်ထုတ်လို့ဟိပါရေ။ ALP က ဒုဥက္ကဌလည်ဟောင်းလည်း ဖြိုက်တေ ဗိုလ်မှူးခိုင်မျိုးမင်းကလည်း “အေကိစ္စရေ ရခိုင်တမျိုးသားလုံးနန့် သတ်ဆိုင်ရေ ကိစ္စတခုပါ။ အေချင့်ရေ အမျိုးသားရေ အင်္ဂါရပ်တခုအနီနန့် လိုအပ်ချက်တခုလည်း ဖြိုက်ပါရေ။ လူမျိုးတိုင်း၊ လူမျိုးတိုင်းမှာ အမျိုးသားနိ ဆိုစော်ဟိပါရေ။ ဗမာမာလည်း ဟိရေ။ ကရင်မှာလည်းဟိပါရေ။ ယေကေလည်းသို့ ရခိုင်မှာ အမျိုးသားနိဆိုစော် အဂုထိအောင် မဟိသိမ့်ပါ။ Identity မဟိရေ သဘောပါ။ ယင်းချင့်ကို ပါတီတခုလည်း အနီနန့်လည်း လုပ်လို့မရပါ။ အဖွဲ့အစည်းတခုတည်းနန့်လည်း မလုံးလောက်ပါ” လို့ ပြောခဖူးပါရေ။ ၁၉၇၅ ခုနှစ်လောက်က မဆလအစိုးရ သတ်မှတ်ပီခရေ ဒီဇင်ဘာ ၁၅ ရက်နိကို ရခိုင်ပြည်နယ်နိပိုင် ကျောက်ဖြူမြို့အပါအ၀င် ရခိုင်နယ်မြို့ နယ် အချို့မှာ ကျင်းပနီစော်ကိုလည်း တွိ့ရပါရေ။ ယေကေလည်းသို့ ယင်း ဒီဇင်ဘာ ၁၅ ရက်နိကို ရခိုင်ပြည်နယ်နိ အဖြိုက်လက်ခံမှုတိ ကောင်းကောင်းမဟိစော်ကို တွိ့နီရပါရေ။ ယင်းပိုင်ဖြိုက်လို့ အေအမျိုးသားနိကို ရခိုင်အမျိုးသားတိ အားလုံး ကိုယ်အမြင် သူ့အမြင်တိကိုလည်း စာရီးပြီးကေ RNDP ကို Email က ဖြိုက်စီ၊ စာတိုက်က ဖြိုက်စီ၊ လူကိုယ်တိုင်း ဖြိုက်စီ လားရောက်ပို့ပီးကတ်ဖို့ လေးဝတီက တိုက်တွန်းလိုက်ပါရေ။