တိုင်းရင်းသားရေးရာဝန်ကြီး တိလုပ်ပိုင်ခွင်နန့် အဆောင်အယေက်တိရေ တိုင်းဒေသန့် ပြည်နယ်ဝန်ကြီးတိကြားမှာ တတန်းတန်းဖြိုက်ဖို့ အကျိုးခံစားခွင့်တူဖို့အတွက် လျှောက်ထားချက်ကို ခြေခံဥပဒေခုံရုံးကနီ အနိုင်ပီးလိုက်ပါရေ။ ယင်းချင့်ကို အမျိုးသားလွှတ်တော်အမတ် ရခိုင်တိုးတက်ရေးပါတီ ဥက္ကဌ ဒေါက်တာအေးမောင်က ပြောပြလားပါရေ။ ပြီးခရေ နိုဝင်ဘာလ လကုန်ပိုင်းလောက်က တိုင်းရင်းသားရေးရာ ၀န်ကြီးတိ လုပ်ပိုင်ခွင့်ကို အခြေခံဥပဒေပြဌာန်းချက်တိနန့် ကွဲလွဲနီရေအတွက် ပြင်ဆင် ပြဌာန်းပီးဖို့ အမျိုးသားလွှတ်တော် ကိုယ်စားလှယ် ၂၃ ယောက်က နီပြည်တော်အခြေခံဥပဒေခုံရုံးမှာ တင်ပြလျှောက်ထားခပါရေ။
ယင်းကိုယ်စလှယ်တိက ဒီမိုကရေစီနန့် တိုင်းရင်းသားပါတီဝင်အမတ်တိ ပါဝင်ပါရေလိုလည်းသိရပါရေ။ တိုင်းရင်းသားရေးရာဝန်ကြီးတိရေ တိုင်းဒေသကြီးအစိုးရ အစည်းအဝေးမှာ ပါဝင်ခွင့်မရရေ အပြင် တာဝန်နန့် လားလာရေအခါမှာလည်း ကိုယ်စရိတ်နန့် ကိုယ်လားရပါရေ။ ယင်းပိုင်ခွဲခြားဆက်ဆံခံရတေအတွက် ဖွဲ့စည်းပုံ အခြေခံဥပဒေနန့် မညီညွှတ်ကြောင့် ပြည်ထောင်စုတရားရုံးချုပ်အနီနန့် တိတိကျကျပြင်ဆင်သတ်မှတ်ပီးဖို့ အမျိုးသားလွှတ်တော်အမတ်တိက အခြေခံဥပဒေခုံရုံးကို လျှောက်ထားခပြီးကေ အမှုကို နိုင်ဝင်ဘာ ၂၈ ရက်နိက ကြားနားစစ်ဆေးခရေလို့လည်း သိရပါရေ။ ယင်းအပြင် ဖွဲ့စည်းပုံအခြေခံဥပဒေနန့် ပတ်သတ်လို့ ပထမဆုံးအကြိမ် ပြည်သူအများသိအောင် ကြားနားစစ်ဆေးခမှုလည်း ဖြိုက်ပါရေလို့ သိရပါရေ။