ဒီဇင်ဘာလ ၁၅ ရက်နိကို ရခိုင်ပြည်နယ်နိ အဖြစ် ၁၉၇၄ ဖွဲ့စည်းပုံအရ ဦးနေ၀င်းဦးဆောင်ရေ မဆလ အစိုးရက အသိအမှတ်ပြုခပါရေ။ ယင်းပိုင်ဖြိုက်လို့ ၃၇ နှစ်ပြည့်မြောက်တေ ရခိုင်ပြည်နယ်နိ အထိမ်းအမှတ်ပွဲကို ရခိုင်ပြည်နယ် ကျောက်ဖြူမြို့နယ်မှာ ဒီဇင်ဘာလ ၁၃ ရက်နီ ဒီဇင်ဘာလ ၁၅ ရက်နိထိ ပြုလုပ်ကျင်းပနီပါရေလို့ သတင်းရဟိပါရေ။ ရခိုင်ပြည်နယ်နိကျင်းပရခြင်း အကြောင်းအရင်းကို “ကျနော်ရို့ ရည်ရွယ်ချက်တော့ခါ အမျိုးဘာသာ၊ သာနာကို ထိမ်းသိမ်းစောင့်ရှောက်ဖို့နန့် ဇာတိဂုဏ် လူကြီး လူငယ်ချေတိအားလုံး သိရှိလာစီဖို့၊ နောက်တခုက အမျိုးသားရေ စိတ်ဓာတ် ရှင်သန်စီဖို့ ချစ်ခင်ရင်းနှီးစွာ စည်းစည်းလုံးလုံးဟိဖို့၊ ယင်းပိုင် ရည်ရွယ်ပါရေ။” လို့ ဦးဆောင်ပါဝင်ရေ လူတယောက်က ပြောပါရေ။ ရခိုင်ပြည်နယ်နိ ပွဲအစီအစိုင်နန့် ပတ်သတ်ပြီးကေ အေပိုင် ဆက်ပြောပါသိမ့်ရေ။ “ကျနော်ရို့ ညဇာက စပြိးကေ ဖြေဖျော်ရေး အစီအစိုင်နန့် စတင်ပါရေ။ နောက်ပြီးကေ ရထားဆွဲလည်းပါပါရေ။ အေနိဆိုကေ ရခိုင်ရိုးရာ ကျင်ပွဲကို စဖို့ ဖြိုက်ပါရေ။
အသျှေတိအတွက်လည်း ပြေးခုန်ပစ်အားကစားတိနန့် ပျော်ပွဲ ရွှင်ပွဲတိ လုပ်လားဖို့ ဖြိုက်ပါရေ။ ဒီဇင်ဘာ ၁၅ ရက်နိမှာ မာရသွန်ပြိုင်တိလည်း ဟိပါရေ၊ လူငယ် လူကြီး စုစုပေါင်း ၁၀၀ ခန့်လာက် ပါဘာဖို့”လို့ ဆက်ပြောလားပါရေ။ ဂီတ ပဒေသာ ဖျော်ဖြေပွဲမှာလည်း ရခိုင်နာမည်ကြီး အဆိုတော်တိဖြိုက်တေ ဦးမောင်သိန်း၊ စိမ်းလဲ့လဲ့၊ ထက်အောင်ကျော် ရို့ အပါအ၀င် တက်သစ်စ အဆိုတော်တိ အများကြီးပါပါရေ လို့လည်း သိရပါရေ။ အေတကြိမ်နန့် ဆိုကေ ကျောက်ဖြူမြို့မှာ ကျင်းပလာစော် ၆ ကြိမ်မြောက်ဟိပါဗျာလ်။
Souce : နိရဉ္စရာ
