တခါတခါ သတိရမိစွာမှာ အဂယင့်ပင် ကိုယ့်ဘားက နီခရေ နီရာတိ ၊ ထိုင်နီခရေ ထိုင်ခုံချေတိ ၊ မိုးရွာထဲ လမ်းလျှောက်လားနီခစွာတိကို စိုင်းစားရမိပါရေ ။ ယင်းခါဆိုကေ ကျွန်တော် အိပ်မပျော်တတ်ပါ ဗျန် ။ ညဥ့် သန်ကောင် -၁၂--ချက်တီးအောင်အထိ မအိပ်ဘဲနင့် နီရေအကျင့်ကလေး ဟိနီစွာက တမှောင့် ပါရာ ဒေ။ အသက်ကိုညဏ်စောင့်ရေ ဆိုကေလေးအမေရိကန်နိုင်ငံနယူးယောက်မြို့ ကတချိန်လုံးသက်ဝင် နီရေ မြို့ ဖြိုက်လို့  မအိပ်ဖြိုက်စွာလေး ပါဖို့ ထင်ပါယင့် ။
တခုတော့ ဟိပါရေ ။
ကိုယ့်ဘားက ဆိုကေ သက်ကြီးခေါင်းချ စကားဆိုရေအတိုင်း ကျွန်တော့်ပိုင်အသက်အရွယ် က ဒေပိုင် နီိဖို့  မကောင်းဗျန်လို့  ပြောရပါဖို့ ချင့် ။ ဖြိုက်နီစွာက ဒေပိုင်မြို့ ကြီးပြကြီး နိုင်ငံကြီးမှာ မအိပ်ဘဲ လုပ်စရာတိ ကို လုပ်နီရစွာကိုပင် အချိန်တိကို ဆွဲထားချင်ပါသိရေ ။ ဗြုံးကနဲသီပါလားကေ ကျွန်တော်ပြောချင်ရေ စ ကား တိကိုအလှပလှမပြေခရဗျန်ဆိုပနာတမလွန်ဘ၀ကို နောင်တအဖြိုက်မယူလားချင်ပါဒေ။ ယေအခါ ကိုယ် နင့်ရင်းနှီးနီထိုင်ခရေ ကိုယ့်ဘားက မိတ်ဆွေအပေါင်းအသင်းတိကို သတိရမိပါရေ ။ ကောင်းကောင်း ကြီး တွိချင်ပါရေ ။ ထူးထူးဆန်းဆန်း ဖြိုက်နီရေ ကျွန်တော့်မိတ်ဆွေရို့ နင့် ကျွန်တော့်ဘ၀ကို စိုင်းစားရေအ ခါ သိကြား မင်းကပင် ဖန်ဆင်းထားလီစွာလား ဆိုပနာ ကိုယ့်စွာကို ကိုယ် စိုင်းစားမိပါရေ ထော ။ ယင်းပိုင် စိုင်းစား မိရေဗျန်ဆိုကေလေး ကိုယ့်စွာကို ပြုံးနီမိလားခပါရေ ယေ ။
ကျွန်တော့်မှာ မိတ်ဆွေတိက အံ့သြ ဖို့ ကောင်းရေပိုင် ချစ်ဖို့ လေး ကောင်းပါရေ ။
ယင်းပိုင်စွာထဲမှာ နိုင်ငံရီးနင့် မပါတ်သက်ဘဲနင့် အခြားကိစ္စတိနင့် သက်သက်လူပုဂ္ဂိုလ်အရ ခင်မင် ရင်းနှီးရေ မိတ်ဆွေ သူငယ်ချင်းတိအကြောင်းကို နောက်ခါကျကေ ပြောပြပါမေ ။ အခုတော့ ရယ်စ ရာကောင်းရေ ချစ်ဖို့ ကောင်းရေ ကျွန်တော့်မိတ်ဆွေ ပေါင်းအသင်းရို့ ကို ပြောပြပါဖို့ ဒေ။
ကျွန်တော့် မိတ်ဆွေရို့ကို ပြောပြရေအခါ လူထူးဆန်းတိ ဖြိုက်နီစွာကို သိကတ်ပါဖို့ ဒေ။ ယင်းလူတိထဲမှာ အခုဆိုကေ စကားမပြောနိုင်ဘဲ လီဖြတ်နီရေ အကိုဦးသိန်းထွန်း ဖြိုက်ပါရေ ။ မိဇံလမ်းကြားဖက်မှာနီပါရေ ။ နဖူးပြော င်ပြောင် နင့် အိမ်ထောင်ဆက် နှစ်ဆက် ဟိပါရေ ။ လမ်းလားကေ ကလေ့မေတိပိုင်လားလို့  မ-ယုံမ လို့  ထင်ကေလေး မယားကတော့ နှစ်ယောက် ယူလိုက်ရရေ သူပါချင့် ။
အခုတော့ကာ နောက်အိမ်ထောင်နင့်ပါရာ ။ နောက်တယောက်ကတော့ခါ ဦးညွန့် မောင် ။ သူကတော့ခါ ကျွန်တော်နင့် နှစ်ပေါင်များစွာ နိုင်ငံရီးကို တွဲလို့  လုပ်ခရေ ညဈီးကသဇင်စားသောက်ဆိုင်ဖွင့်ခရေအိမ်က ပါယေ ။ ၁၉၉၀-ခုနှစ်ကရွီးကောက်ပွဲမှာစစ်တွေမြို့ နယ်တသီးပုဂ္ဂလလွှတ်တော်ကိုယ်စားလှယ်အဖြိုက်တက် ခရေ လူပါယေ ။ အခုတော့ ကုန်ခရေနှစ်က သီလားခပါဗျန် ။ မသီခင် ရခိုင်တိုင်းရင်းသားတိုး တက်ရီးပါ တီကို ဗဟိုကော်မီတီဝင် အဖြိုက် ပါဝင်လှုပ်ရှားခပနာ ရခိုင်ပြည်မှာ တပါတီဖြိုက်အောင် လုပ်ပီးခရေ သူ ပါဒေ။ နောက်တယောက်ကတော့ခါ ဆရာဦးစောဖြူပါရာ ။ ဦးစောဖြူက မဟာပညာကျော် ကျူရှင်ကို ဖွင့် ပနာ အင်္ဂလိပ်စာပြနီခရေ ကျောင်းဆရာ ဦးစောဖြူပါ ။ အခုဆိုကေ ရခိုင်တိုင်းရင်းသားတိုးတက်ရီး ပါတီက မင်းပြားမြို့ နယ် လွှတ်တော်ကိုယ်စားလှယ်ပါယေ ။ နောက်တယောက်ကတော့ခါ ဆရာ ဦးစောဖြူနင့် ကျူ ရှင် အတူတူပြရေ မောလိပ်က ဦးအောင်ကျော်လှဖြိုက်ပါယင့် ။ ဆရာဦးစောဖြူရို့  ဦးအောင်ကျော်လှ ရို့  ကြားမှာ ဒါရိုက်တာဖြိုက်တေ ရှေ့နေ ဦးကံကြီးမောင်ကိုလေး မိလို့ ကား မရပါဒေ
ဒေချင့်ထဲမှာ ကျွန်တော် နင့် ဦးညွန့် မောင်က နိုင်ငံရီးကိစ္စတိကို တွဲလုပ်ရေ လူဖြိုက်လို့  အင်ဒိုင်ချေ နီးနီးကပ်ကပ် နီဖြိုက်စွာများ ပါရေ ။ ယေကေ အကိုဦးညွန့် မောင် အကြောင်းကို စလို့  ပြောပြရပါဖို့  ။ ညဈီးမှာ အသားမဲရေ မိသားစု ဆိုကေ လူတိုင်းသိကတ်ပါရေ ယေ။ ဖြူရေဆိုလို့  သွားတိရာ ဖြူစွာ မိသားစု မဟုတ်ပါလားယေ ။ ပြည် တွင်းရီကြောင်း သယ်ယူပို့့ ဆောင်ရီး လုပ်ငန်းမှာ သဘောင်္စာရီး ဖြိုက်ပါရေ ။
ယင်းအလုပ်ကို ကိုညွန့် မောင် နင့် အကိုဖြိုက်သူ အကိုဦးကျော်သာပါ နှစ်ယောက်စလုံး ပြိုင်တူ ရစွာပါယေ ။ ရွှေတကျပ်သားကို ဖေ့ချာ-၁၅၀၀- လောက် မဟိရေအချိန်မှာ ကိုညွန့် မောင်က သဘောင်္ စာရီးဆိုရေအခါ အလှပလှ သုံးနိုင်ဖြုံးနိုင်သူပါချင့် ။ ယေကေလေး လစာရလို့  ဟိကေ ကျွန်တော်ရို့ ပိုင် အလုပ်မဟိ အကိုင်မဟိရေ လူတိပါးကို လာပနာ လဘက်ရည်ဆိုင်ထိုင်ဖို့  ၊ မုန့် စားဖို့  လာယင်း ပင်း ပြော လိုကတ်တေ နိုင်ငံရီးးစကားကား တခါချေလေး မဆုံးပါကားယေ ။
၁၉၆ရ-ခုနှစ်မှာ ဆန်ပြသနာဖြိုက်တေ အခါ ဘုရားကြီးက စလို့  ထွက်ကတ်စွာမှာ ကိုညွန့် မောင်လေး ပါပါရေ ယေ။ ဆန်ပြသနာဖြိုက်ဗြီးကေ ရခိုင်အမျိုးသား လွပ်မြောက်ရီးပါတီကို လားပနာ တောခိုခြီစွာမှာ သနေတ်မဟိစွာကို မြင်ခရပါရေ ။ ယေကေ စစ်တွေမြို့ ကို လာပနာ သေနတ်လုဖို့  ကျွန်တော်နင့် တိုင် ပင်ပနာ လုခကတ်စွာ တလက်လေး မရခလို့  ကံကောင်းကတ်ပါရေ ။ တလက်ချေလောက်ရာ ရခကေ ယင်းပိုင်သေနတ်လုခရေ လူတိကို လိုက် ပနာ ပစ်သတ်လို့  ဇါနှစ်ယောက် သီဖို့ စွာလေး မသိပါကားယေ ။
ကိုညွန့် မောင်က ချစ်ဖို့ ကောင်းစွာ မှာ လုပ်စရာဟိကေ ထလို့  လုပ်တေဆိုစွာမျိုးကို ပြတ်ပြတ်သားသား လုပ်စွာပါယေ၊ သေနတ်လု မူ ဖြိုက် ဗြီးရေ ခါ ကတည်းကပင် ကိုညွန့် မောင် သဘောင်္စာရေးအလုပ် က ပြုတ်လားခရပါရေ ။ တနား နီကေ ထောင်ကျနီ ၊ တနားနီကေ နိုင်ငံရီးမှူနှင့် ပြသနာဖြိုက်နီရေ လူမှာ ဇါက အလုပ်မြဲလီ ပါဖို့ လေးယင် ။ ယေကေလေး အလုပ်က ကိစ္စမဟိပါ ။ ညဈီးမှာ ဖြိုက်လို့  စီးပွါးရီးက ဇါချင့်ကို ထလို့  လုပ်လို့  ရပါရေ ။ မှတ်မှတ်ရရ တခုကို ပြောဖို့  ကျပါဖို့ ထော ။ တရက်နိက စစ်တွေမြို့ မှာ သင်္ကြန်မဏ္ဍပ် အတွက် ဖေ့ သာကောက်စွာနင့် ဆုံပါရေ ဒေ။ ကျွန်တော်နင့် ကိုညွန့် မောင်က ပျင်းလို့့  အိမ်မှာ ထိုင်နီကတ်တေအချိန်ပါဒေ။ သဇင်စားသောက်ဆိုင်က နိုင်ငံခြားအရက်တိကိုရာ ရောင်းပါရေ ။
အခြား တောအရက်တိ -ကုန်သွယ်ရီး-၄-ရက်က အရက်ဖြူတိကို မရောင်းပါဒေ ။ ယင်းချင့်မှာ ပြသနာက အရက်က စစွာ မဟုတ်ပါလား ။ ကိုညွန့် မောင်ရို့  အိမ်က စစ်တွေမြို့ အမှတ်(၁) ရဲစခမ်းနင့်မျက်စောင်းထိုး ကျနီရေအခါ ပုလိပ်တိနင့်လေး အားလုံးသိနီကတ်စွာပါရာယေ ။ ယေကေလေး ကျွန်တော်နင့် ကို ညွန့် မောင်က ပုလိပ်တိကို စကားပြောရေ လူကား မဟုတ်ပါယေ ။
သင်္ကြန်ကျဖို့ ဗျန် ဖြိုက်လို့  အမှတ်(၁) ရဲစခမ်း သင်္ကြန်ရီလောင်း မဏ္ဍပ်အတွက် ဖေ့သာကောက်ပါရေလို့  ပြောရေအခါ ကျွန်တော်နင့် ကို ညွန့် မောင် ရယ်ကတ်ပလိုက်ပါရေ ။ နောက်ဗြီးကေ ကိုညွန့် မောင်က ဒေပိုင်စွာမျိုးကို လက်လေး မခံရေ လူဖြိုက်လို့  ပုလိပ်တိကို ထပ်လို့  မီးပါသိရေ ။ ပုလိပ်တိကလေး ကောင်းကောင်းမွန်မွန် ဖြီပါရေထော ။ အရက်ကို ရောင်းရေ အတွက် ရံပုံငွေ သဘောနင့် ကောက်စွာမျိုး ပြောရေအခါ ကိုညွန့် မောင်က အခုက ပင် စလို့  မရောင်းဗျန် ဆိုပနာ ပိတ်ပလိုက်ပါရေ ။ ပုလိပ်တိကလေး တောင်းပန်ပါရေ ။ မရပါဗျန် ၊ ပုလိပ်တိ ကို သင်္ကြန်အတွက် ဖေ့သာကို ဆက်ကြီး ကောက်တေပိုင် လာကောက်တေ ဆိုကေမပီးနိုင်စွာ ပြောဗြီးကေ အခုကပင် သဇင်စားသောက်ဆိုင်ကိုလေး ပိတ်တေ ဆိုပနာ ပိတ်ပလိုက်စွာပါ ။ ခေါက်ဆွဲဖက် ထုတ် နင့် ခေါက် ဆွဲကျော် တခုတည်းကိုရာ ရောင်းရေ သဇင်စားသောက်ဆိုင်မှာ ယင်းနိကပင် စလို့  တခု ကိုလေး မရောင်း လိုက်ပါဗျန် ယေ ။
၁၉၉၀-ခုနှစ် ရွီးကောက်ပွဲလုပ်တေအခါ ဖေ့သာမဟိလို့  အိမ်ဘေးက တခြမ်းကို စက်ခြုပ်ဆိုင်ပိုင် ရှင်ကို ခေါ်ပနာဆိုင်ခမ်းငှားဖြိုက်ခပါသိရေ။ယင်းခါလေးကျွန်တော်နင့်ကိုညွန့် မောင်နှစ်ယောက်ပေါင်း ဖေ့ သာက ရွီးကောက်ပွဲဝင်ဖို့  ဖေ့သာ မဟိစွာပါဒေ ။ ယေကေလေး စက်ခြုပ်ဆိုင်ရှင်ကို ပြောရေအခါ သူ့ မှာ ရှိသမျှ ဖေ့သာကို စုပနာ လာပီးပါရေ ။ တခြားအချိန်မှာ ညဈီးမှာ ဆိုင်ငှားကေ သိန်းနှင့်ချီလို့  ရနိုင်ကေေ လး ကျွန်တော်နင့် ကိုညွန့် မောင်မှာ ရွီးကောက်ပွဲဝင်ကြီး လောက်ကိုရာ ယူပနာ ရွီးကောက်ပွဲဝင်ဖြိုက် ခကတ်ပါရေ ယေ ။ ယင်းပိုင် ဖေ့သာကို တန်ဖိုး မထားရေ ကို ညွန့် မောင်မှာ ချစ်ဖို့ ကောင်းရေ အချက်ချေ တိ-မဟုတ်ပါလားယေ ။ သားသမီးတိကို နာမည် ပီးစွာမှာလေး ရက္ခ၀ံသ၊ ဓည၀ံသ ၊ အိန္ဒာ ။ ရက္ခသူရိယ နာမည်တိနင့် ထားခစွာ အလှပလှ အမြော်အမြင် ကြီးမားရေ မဟာရခိုင် မျိုးချစ် ကိုညွန့် မောင်ပါရာချင့် ။ တသီးပုဂ္ဂလ တက်ခစွာကလေး တခုပိုင်ချေလေး ညှိနိုင်းလို့ မ ရရေအခါ ယင်းပိုင် ဆိုင်ခမ်းငှားပနာ ၀င်ခကတ်စွာပါရာ ။ ဖေ့သာရှိလို့  ၀င်ခကတ်စွာကား မဟုတ်ပါဒေ။ ကိုညွန့် မောင် ခံယူချက် တခု ဟိပါရေ ။ ယင်းချင့်ကား နိုင်ငံရီးသမားတိအတွက် နိုင်ငံရီး စင်မြင့် တခုပီးကတ်ရဖို့  ဆိုစွာပါဒေ။ နိုင်ငံရီးလောကမှာ နိုင်ငံရီးသမားကရာ စကားပြောကတ်မေ- လုပ်ကတ်မေ ဆိုစွာမျိုးကို ရက်ပြတ်ပြောခပါရေ ဒေ။ ယေဇူးနင့် တခါက မှားခရေ အတွက် -၂၀၁၀- ရွီးကောက်ပွဲ ကျရေအခါ တပါတီဖြိုက်ဖို့  အတွက် လုပ်ကတ်ရဖို့  ဆိုပနာ လုပ်ခစွာထဲမှာ ကိုညွန့် မောင်က ပါပါရေ ။ ဦးဆောင်စွာထဲမှာ ပါခပါရေ ။ ကျွန်တော်က အမေရိ ကန်က နီပနာ တိုက်တွန်းပါရေ ။ အကူအညီ ရရေပိုင် ပီးပါရေ ။
ဆရာဦးစောဖြူကတော့ခါ ချစ်စရာဆိုလို့  သနားဖို့ ကောင်းရေ လူတန်းစားထဲမှာ ပါစွာပါဒေ။ မြို့ နယ်စီမံကိန်းရုံးမှာ စီမံကိန်းမှူး လုပ်နီခစွာက နိုင်ငံရီး မှူနှင့် ထောင်ကျပနာ အလုပ်ပြုတ်လားခသူပါယေ ။ ယင်းအချိန်ကပင် စလို့  တသက်လုံး ကျူးရှင် ပြစားနီ ခရေ လို့  ပြောလို့  ရပါဖို့  ။ ကျွန်တော်ရို့ နင့် စစ်တွေမှာ ဆုံကတ်တေအခါမှာကား ကျောက်ဖြူက မယား ကို ကွာပလိုက်ပါဗျန် ဒေ။ ယေကေလေး သမီးချေ တယောက်ကို ထောက်ပံ့ကြီး ပီးပနာ လွမ်းနာကျလို့  တယောက်ထဲ နီရရေ သူပါဒေ။ ဆရာဦးစောဖြူက ဒေါသမာန မဟိတတ်တေ လူပါမနား ။ အားလုံးပြ သနာတိ ကို သွီးအီးအီးနင့် စိုင်းစားနိုင်သူပါ ဒေ။ ကိုယ့်ထင်မြင်ချက်ကို ပြောလို့  မရကေ မပြောဘဲ လူများ ထင်မြင်ချက်ကို အကောင်းဆုံးဖြိုက်အောင် လုပ်ပီးရေ လူပါယေ ။ နောက်အိမ်ထောင်ပြုစွာမှာတောင် မှ ပြိုင်ပနာ အရွီးခံဗြီးကေ အိမ်ထောင်ပြုစွာမျိုးပါဒေ။ ယေကေ အိမ်ထောင် ဇါပိုင် ပြုခရလေ ဆိုစွာကို ပြော ကတ်ရပါဖို့  ထော ။အမှန်က ဒေနီရာမှာဆရာဦးစောဖြူအကြောင်းကို ပြောခြီကေရခိုင်ပြည်နယ်မင်းပြား မြို့ နယ် ပြည်သူ့ လွှတ်တော်ကိုယ်စားလှယ် ဖြိုက်နီရေအတွက် အားနာရဖို့  ကောင်းပါရေ ယေ။ ယေကေလေး ကျွန်တော်က ချစ်ဖို့ ကောင်းရေ ကျွန်တော်နင့် နီခရေ လူတိအကြောင်းကို ပြောရေအခါ ဇါချင့်တိကို ချစ်ဖို့ ကောင်းလေ ဆိုစွာကို ပြချင်လို့  ရီးပြလိုက်စွာပါရာ ။
ဆရာဦးစောဖြူ အိမ်ထောင် ကျလိုက် စွာက ဒေပိုင်ပါဒေ။
အိုးတန်းမူလတန်း ကျောင်းရှေ့မှာ မယိုင်စ်ိန်ဖြူက လုံးကြီးပေါက်လှ ။ သား သမီး တိက လူပျိုပေါက်တိ ဖြိုက်နီဗျန် ။ သမီးတောင်မှ အိမ်ထောင်ကျလို့  သားချေ တယောက် ရနီဗျန် ။ သိမ်းငှက် ထမင်းဆိုင်လား မသိပါဗျန် ဒေ။ နာမည်ကို မိလားခပါဗျန် ။ ယင်းဆိုင်မှာ ကျွန်တော်ရို့့ ထိုင်ဖြိုက် ကတ်ပါရေ ။ ယေအခါ ဆရာဦးစောဖြူ ၊ ကိုအောင်ကျော်လှရို့့ နှစ်ယောက်က ကျူရှင်ဗြီးစွာနင့် တန်းဗြီး ပနာ ရောက်လာတတ်ပါရေ ။ ကျွန်တော်နင့် ကိုညွန့် မောင်က အတူတူ လားဖြိုက်ကတ်ပါရေ ။
တခါတခါ ရှေ့နေဦးကံကြီးမောင် နင့် ကိုနီအောင်ကျော် ရို့  ၀င်လာပနာ တပ်ပေါင်းစုဝိုင်း လုပ်ဖြိုက်ပါရေ ။ ယင်းပိုင် လူအင်အား ကောင်းလီ ကျွန်တော်ရို့ က ဆိုင်ပိတ်အောင်အထိ နီလီစွာပါရာ ။ တနိခါ ရှေ့နေ ဦးကံကြီးမောင်က မယိုင်စိန်ဖြူ ကို စကားစပနာ အိမ်ထောင်ပြုဖို့  ဗြောင်ပြောပါရေထော ။ ယင်းချင့် မှာ ပြသနာက စလာစွာပါရာမနား။ ယေကေ မယိုင်စန်ဖြူအတွက် ကျွန်တော်ရို့့ က ကံထူးသူ အိမ်ရှင်ကို ရွီးပီးဖို့  ဆိုပနာ ပြောဖြိုက်ကတ်ပါရေ ။ လုံးကြီးပေါက်လှ မယိုင်စိန်ဖြူ ကလေး ကျွန်တော်ရို့ ဝိုင်းက လူတော်လူကောင်းတိကို ကြည့်ပနာ အပျော်တိ ကူးစက်တတ်ပါရေ ။ ယင်းအထဲမှာ လူတယောက်စီ အကြောင်း ကို ပြောဖို့  ကျပါဖို့ ဗျန် ၊ ကိုနီအောင်ကျော် ဆိုစွာက ကွန်မြူနစ် သမား ။ ဦးနုလက်ထက်က တည်းက အဖမ်းခံနီရစွာ ။ ရုရှားနိုင်ငံကို လားဖူးရေ လူ။ ရုရှားစကားကို လေး ပြောတတ်သူ ။ သူ့ လွယ် အိတ်ထဲမှာ ရီပုလင်း တလုံ့းရာပါရေ ။ ပြင်ခံ အင်င်္ကျီ ၀တ်တတ်ဗြီးကေ ရန်ကုန်မှာ နီသူ ၊ အခု ၁၉၉၀- ရွီးကောက်ပွဲ ၀င်ဖို့ လာယင်း တပ်ပေါင်းစု က ကိုယ်စားလှယ်အဖြိုက် ၀င်ခစွာဖြိုက်တေ ။
ရှေ့နေ ဦးကံ ကြီးမောင်က ကျွန်တော်နင့် တလမ်းထဲ ။ ယေဇူးနင့် မယိုင်စိန်ဖြူ အိမ်ကိုလားဗျန် ဆိုကေ အတူတူ လား ဖြိုက် ကတ်ပါရေ ။ ရှေ့နေ ဦးကံကြီးမောင်က နဖူးပြောင်ပြောင်နင့် ကြက်သရီရှိရေ မျက်နှာနင့် ၊ တချို့  ဆိုကေ လူမသိကေ စခမ်းကြီးရေ ထင်ဖို့  ၊ အမှန်က ရှေ့နေ ဦးံကံကြီးမောင် မှာ လူရိုး လူအပါရာ ။ လူပေါ လို့  ပြောကေ ရပါရေ ။ ယင်းပိုင် လူပေါဖြိုက်လို့ လေး လုံးကြီးပေါက်လှ မယိုင်စိန်ဖြူကို အိမ်ထောင် ချပီးစွာ မှာ အဓိက အခမ်းက ပါရေ လူပါမနား။ သူပြောပြစွာက မယိုင်စိန်ဖြူကို ဒေပိုင်ပါဒေ။ ကိုနီအောင်ကျော်မှာ လွယ်အိတ် တလုံ့းထဲ ရီပုလင်းက လွှဲလို့ အရာတခုချေလေး မပါ ။ ယေကေလေး မျိုးကြီး ဆွီကြီး သမား ။ အိမ်ထောင်ပြုကေ ပြုနိုင်ရေ ၊ တခုချေလေး လုပ်စားဖို့  မတတ် ။ ယင်းပိုင်ပြောရေအတွက်နင့် မယိုင်စိန် ဖြူက ကိုနီအောင်ကျော်ကို အမှတ်လျှော့ပီးထားပါရေ ။ ကိုအောင်ကျော်လှက ခန္ဓာရေ ။ ရော ဂါက စုံရေ ။ သွီးတိုး နှလုံးရောဂါဟိရေ ။ ဆလိပ်ကောင်းကောင်း သောက်တေ ။ မိဖဆွီမျိုး ဖေ့သာဟိရေ ။ ရွှီပန်းထိမ်ပိုင် ရှင် သားသမီးဖြိုက်တေ ။ ပညာတတ်အသိုင်းအ၀န်းဖြိုက်တေ ။ ယေကေ မယိုင်စိန်ဖြူက ပညာမတတ် ၊ ထမင်းဆိုင် အရက်ဆိုင် ရောင်းစားရေသူ ။ သားသမီး-၄-ယောက် ဟိရေ ၊ ကိုအောင်ကျော်လှ မိသားစုတိ လက်ခံနိုင်ဖို့  မထင် ။ ယေကေ အမှတ်လျှော့ထားလိုက်ဗျန် ။ ဆရာဦးစောဖြူ ၊ သူ့ မှာ သမီးချေတယောက် ကို ထောက်ပံ့ပီးနီရ ရေ ။ မယားကလေး ကျောက်ဖြူမှာ ၊ ဒေမှာက ဖြိုက်သလို နီရေ ။ မဟာပညာကျော် ကျူရှင်ကို ပြနီစွာ ၊ သူ့ ကို အမှတ်ပိုပီးထားလိုက်ဗျန် ။ ယင်းပိုင်တွက်ချက်ပနာ ရှေ့နေ ဦးကံကြီးမောင်က လုပ်ထားပါရေထော ။
တိုက်တိုက်ဆိုင်ဆိုင် ဆရာဦးစောဖြူက ရင်ဖွင့်ရေ နိ ။ ထမင်းဆိုင်မှာ စားဗြီးလို့  ပြန် လားခရေ လူတိကလေး ပြန်လားခကတ်ဗျန် ။ သားသမီးတိကလေး မဟိ ၊ အရက်သောက်ခကတ်တေ လူတိကလေး တယောက်လေး မနီခကတ်ဗျန် ၊ ကျွန်တော်ရို့ တိကလေး ယင်းနိက ၀ိုင်းကို စောစော သိမ်း ပနာ အိမ်ပြန်လားခကတ်ပါရေ ။ ယင်းနိမှာ မူးဂန်ဆောင်စွာလား ၊ အဂယင့်ပင် မူးလားခစွာလား မသိ ၊ မ ယိုင်စိန်ဖြူကို ချစ်မိကြောင်း ၊ လက်ထပ်ယူဖို့ အကြောင်း ပြောပလိုက်ပါရေလတ်ထော ။
နောက်တရက်မှာ ဆရာဦးစောဖြူ ကျွန်တော်နင့် တွိရေအခါ ပြောပြပနာ ကျွန်တော်နင့်အတူ မင်းဂံ ရွာမှာ သောင်တင်လိုက် ရပါဗျန် ဒေ ။ မင်း၈ံရွာမှာ ကျွန်တော့် မှာ ခြံဟိပါရေ ။ ယင်းခြံမှာ စာတိ ဆောင်းပါး တိ ကို ရွီးနီစွာပါယေ ။ ဆရာဦးစောဖြူက မဲဖါးအိမ်မှာ ကျူရှင်ပြပါရေ ။ မင်း၈ံရွာသားချေတိ ဆင်းရဲကတ် လို့  အလကား အင်္ဂ လိပ်စာ ပြပီးနီစွာပါ ။ အချစ်သူရဲကောင်းကြီး ဆရာဦးစောဖြူမှာ မယိုင်စိန်ဖြူ ဆိုင်ကို မလားဝံ့ပါ . မျက်နှာ မပြရဲပါဗျန် ။
မဲဖါးနင့် ကျွန်တော်က ဆရာဦးစောဖြူကို မင်းဂံမှာ ထားခယင်းပင်း မယိုင်စိန်ဖြူ ဆိုင်ကို လားခကတ်ပါရေ ။ မဲဖါးက ရွက်လှမြိုင်စာအုပ်အငှားဆိုင်ကို မယိုင်စိန်ဖြူ ရို့  အိမ်နား မှာ ဆိုင်ဖွင့်နီခစွာပါရာ ။ ကျွန်တော်ရို့  ရောက်လားစွာနင့် မယိုင်စိန်ဖြူ သမက်က မကြီနပ် ။ ယေဇူးနင့် မဲဖါး ကို အားမနာ စကား ပြောပနာ ရန်ရှာချင်ချင် လုပ်နီပါရေ ။ မဲဖါးက အရပ်အမောင်းက -၄ ပေ- သာသာ လောက် ဖြိုက်တေခါတရုပ်ချေကအားမနာ ပြောဝံ့စွာပါရာ။တရုပ်လူမျိုး ဖြိုက်လို့ တရုပ်ချေလို့  ပြောစွာပါ ရာ ။ ကျွန်တော်က မယိုင်စိန်ဖြူကို အကျိုး အကြောင်း ပြောလိုက်ပနာ အီးအီးဆီး ထိုင်နီလိုက်ပါရေ ။ ကောင်းကောင်း မကြာလိုက်ပါယေ ။ ကံထူးရှင် ဆရာဦးစောဖြူ အတွက် လုံးကြီးပေါက်လှ မယိုင်စိန်ဖြူ အဖြီပီးလိုက်စွာက ချစ်တေ အကြောင်း မဟုတ်ပါကားယေ ။ ဆရာဦးစောဖြူမှာ အင်ကျီင်္ မဟိရေ အတွက် ခြုပ်ဗြီးသား အင်င်္ကျီ တထည် အိတ်မှာထည့်ပနာ ပီးလိုက်စွာရာ မဟုတ်ပါလား ယေ ။ ယေဗြီးကေ နောက် တ ပါတ်မှာ မဲဖါးအိမ်ကို လာဖို့  အကြောင်းကိုလေး ပြောလိုက်ပါသိရေ ။ တခါလာလေး မဲပြာဒယော ပိုင် ၀တ်နီရေ လူကို ဇါအချိန်ကပင် သတိ ထားနီစွာကား မပြောတတ်ပါကားယင် ။
ယင်းပိုင်အခြီအနီဖြိုက်လားစွာက သမီးဖြိုက်သူ အေးမိစံ နင့် ပတ်သက်ပါရေ လတ် ။ အေးမိစံက နှလုံး ကို စက်တပ်ထားရေ ဆိုရေခါ သူ့ ကို ထိခိုက်အောင် မလုပ်ရပါ ယေ ။ ယေဇူးနင့် အေးမိစံကို ပြောရေအခါ စီးပွါးရီးအတွက် တရုပ်ချေဖြိုက်တေ အေးမိစ-ံလင်ကို ဖေ့သာထုတ်ပီးခစွာ အကြောင်းတိ ၊ တခုချေလေး လုပ်လို့  ကိုင်လို့  မဖြိုက်စွာတိ ၊ အခုအချိန်မှာ အိမ်ထောင်ပြုထားရဖို့  ဖြိုက်နီရေ အကြောင်းတိ ။ အေးမိ စံရာ သီလားခကေ အမိဖြိုက်သူမှာ အားကိုးစရာ မဟိစွာအကြောင်းတိ ပြောပြရပါရေ ။
ယေကေမေမေ နောက်အိမ်ထောင် ပြုကေ စိတ်ချမ်းသာဖို့  ဆိုကေ အိမ်ထောင်ပြု ပါလီ မေမေ - ယင်းချင့်တခုရာ သမီးက ကျေးဇူးဆပ်စွာဖြိုက်ပါလီဖို့  ဆိုပနာ ခွင့်ပြုလားခပါရေလတ် ။ ယေဇူးနင့် ဆရာဦးစောဖြူမှာ မယိုင်စိန်ဖြူနင့် အိမ်ထောင်ကျ လားခစွာပါယေ ။
ဒေနီရာမှာ ကိုအောင်ကျော်လှ က လူပျိုကြီး ဂိုက်ကို တပြားလေး မချ ။အလှပလှပီသပါရေ ဒေ။ ကျောင်းတက်ရေနိဆိုကေ ကျောင်းတက်ဗြီးမှ ။ ကျောင်းမတက်ရရေ နိဆိုကေ စောစောကြီး ဆိုင်ကိုလာပနာ ထိုင်ဗြီးကေ နီတတ်သူပါယေ ။ လက်ထဲက ဆလိပ်ကို တလိပ်ဗြီးကေ တလိပ်သောက် ယင်း နီတတ်စွာပါရာ ။ ဆရာဝန်ကြီးဘားကို ကျွန်တော်နင့် လား ပြကေ ဆီးခမ်းထဲကို ၀င်ခါမှာ ဆလိပ် ကို လမ်းပေါက်ဝနားမှာ ထားခရေ လူစားမျိုးပါယေ ။ ကျွန်တော်ရို့  မဲဆွယ်စည်းရုံးရီး အတွက် လိုက်ဗျန် ဆိုကေ သူခန္ဓာ ၀စွာကို မစိုင်းစားဘဲနင့် တဟူးဟူးနင့် လိုက်ပနာ လမ်းလျှောက်လိုက်ပါရေ ။ ယေဗြီးကေ ဒေနိခါ ဟောပြောပွဲ အားရဖို့  ကောင်းရေ ဆိုပနာ ဂုဏ်ပြုတတ် စွာကလေး ကိုအောင်ကျော်လှပါကား။ မယိုင်စိန်ဖြူကို ကျစွာကလေး သူလေး ပါပါရေ ။ ယေကေလေး စကား မပြောဝံ့ပါ ။ သူ့ အဖို့  ကောင်းေ ကာင်းကြီး ဟန်ဆောင်ခရပါရေ ။ ထမင်းဆိုင်မှာ ချက်ထားသမျှ အမြည်းတိကို အားလုံးမှာ တတ်စွာက သူ့့ ဝါသနာပါချင့် ။ သူရာအယင်ရောက်နီခကေ မှာထားစွာတိကို တယောက်ချေလေး မရှင်း ရဘဲ သူက ဒိုင်ခံရှင်းတတ်စွာကလေး ချစ်ဖို့  ကောင်းပါရေ ။
မိဇံက ကိုဦး သိန်းထွန်း ကျခါတော့ တမျိုး ပါထော ။ နိုင်ငံရီးစကားကို မပြောတတ်ပါဒေ ။ ယေကေလေး ကျွန်တော်နင့် ကိုညွန့် မောင်က ပြောနီဗျန် ဆိုကေ နားထောင်ကောင်းရေ ထဲမှာ ယင်းအကို ဦးသိန်းထွန်းပါပါရေ ဒေ ။ နိုင်ငံရီးသမားတိက တ ခုချေလေး လုပ်စားဖို့  မတတ်လို့  ပြောကတ်စွာလေး မှန်ဖို့ လား မသိပါဒေ။ မဟု တ်ကေ လုပ်စားလို့  မတည့်လို့ လား မသိလို့  ပြောလို့  ရပါဖို့ လား မသိပါ ။ ကျွန်တော်နင့်ကိုညွန့် မောင်က တရက်နိခါ စိုင်းစား ကတ်ဖြိုက် ပါရေ ။ ဘိုးဘွားရီပ်သာနားက ကိုညွ န့်မောင်ခြံမှာ သစ္စာပန်းစိုက်ကတ်ဖို့  စွာကို ပြောဖြိုက်ကတ်ပါရေ ။ ယေဇူး နင့် ကိုဦးသိ်းထွန်းက သစ္စာပန်း မျိုးစိဝယ်ဖို့  ဖေ့ချာ-၃၀၀၀- ထုတ်ပီး ပါရေ ။ ယင်းဖေ့သာကို မယိုင်စိန်ဖြူ ဆိုင်မှာ လာယူခလိုက်ဆိုလို့  ကျွန်တော်လားယူပါရ ။ ကံဆိုးချင်စွာက ကိုဦးသိန်းထွန်းနားမှာ -မောလိပ် - ခြင်္သေ့မင်းနာရီဆိုင် -က ယင်းသူလေး ထိုင်နီပါရေ ။
ကျွန်တော်က ဖေ့သာယူဗြီးကေ ခြံကို လားခြီရဖို့ လို့  ပြောစွာနင့် ယင်းသူက တနားချေပါ ။ နက်ဖန် ခါ ဒေဖေ့သာကို ပြန်ပီးပါမေ - ကျေးးဇူးပြုလို့  အခု တချက်ချေ ပီးပါနန်း ဆိုပနာ ယူလားစွာ မဟုတ်ပါ လားယေ ။ ကျွန်တော်လေး ကိစ္စ မဟိ ဆိုပနာ - ဘိုးဘွားရိပ်သာနားက ခြံကို လားခပါရေ ။
နောက်တ ရက်ခါ ယင်းဖေ့သာကို ရဖို့  လား တောင်းကြည့်စွာ မရပါဗျန် ။ ယေဇူးနင့်လေး ဆက်လို့ မတောင်းလိုက်ဘဲ ယင်းအတိုင်း ထားလိုက်ရပါရေ ။ ဗကပ ပါတီမှာ နှစ်ပေါင်း -၂၀- လောက်တောခိုနီခစွာ သန်းမောင်နင့် ရခိုင်ပြည်လွပ်မြောက်ရီးပါတီ က ခိုင်မိုးလင်းရို့ နင့် အတူတူ ဆင်းလာစွာမှာ အဖမ်းခံလို့  ထောင်ကျနီခရေ ဦးစံရွှေ ရို့  နှစ်ယောက်ကို သစ္စာပန်းစိုက်ခကေ ခြံစောင့်ထားစွာကို လေး - အစီအိစုင်ပျက်လားခလို့  မထားဘဲ ပြန်လားစီခိုင်းလိုက်ရပါရေ ။ ကိုဦးသိန်းထွန်းကတော့ခါ ယင်းအကြောင်းကို တခုချေလေး မပြောရေပိုင် ကိုညွန့် မောင်လေး တခုလေး မပြောဖြိုက်ပါဗျန် ။
အခုတော့ ကျွန်တော့်မိတ်ဆွီ အပေါင်း အသင်းတိကို ကျွန်တော်စကား ပြောလို့  မရလိုက်ပါဗျန် ။ အမေရိ ကန် နိုင်ငံ နယူးယောက်မြို့ မှာ နီလို့  စကားပြောလို့  မရစွာကား မဟုတ်ပါယေ ။ ဆရာတော်ဦးဥတ္တမ မွီး နိဖြိုက်တေ ဒီဇင်ဘာလ-၂၈-ရက်နိအ တွက် ကျွန်တော်က မလေးရှားက ရခိုင်ရဖျူဂျီ ကော်မီတီက ဖေ့သာ ထည့်ပီးစွာတိနင့် ပေါင်းပနာ ကို ညွန့် မောင်ဘားကို မွီးနိပွဲ လုပ်ဖို့  အတွက် ဖေ့သာ ပို့ ခနိုင်ပါသိရေ ။ ကိုညွန့် မောင်ကလေး ဒုံးတိုက်ပြင် ကွင်နားက ဘုန်းကြီးကျောင်းမှာ လုံခြုံရီးတိကြားက အခမ်းအနား လုပ် ဗျန် အမိသီခါနီးကို မစောင့်နိုင်ဘဲ ရန်ကုန်ကို ကိုယ်ရောင်ဖျောက်လားခရပါရေ ။ ရန်ကုန်ရောက်လို့  မကြာ ခင်မှာ အမိသီလားခပါရေ ၊ ကို ညွန့် မောင်က မလားလိုက်ရပါ ။ လားခြီကေ ဆရာတော် ဦးဥတ္တမ မွီးနိကို လုပ်ခရေအတွက် ဖမ်းလား နိုင် ပါရေ လေ ။ ကျွန်တော် က ဆရာတော် မွီးနိကို လုပ်ခိုင်းလို့  အမိသီလားရစွာတောင်မှ မလားခြီကေလေး အပြစ်မမြင်ရေ လူပါကားယေ ။
ကျွန်တော် ကောင်းကောင်း စကား ပြောချင်ရေအထဲမှာ ကျွန်တော့်မိတ်ဆွီ အပေါင်းအသင်းတိကိုပါဒေ။ အခုတော့ ကျွန်တော် မပြောဖြိုက်နိုင်ပါဗျန် ။ မိဇံက အကို ဦးသိန်းထွန်းက လီဖြတ် လို့  စကား မပြောနိုင် ပါဗျန် ၊ ဇါပိုင် လုပ်လို့  ပြောနိုင်ပါဖို့ လေး ။ ကိုဦးသိန်းထွန်း လီဖြတ်ခရေ အကြောင်း ကို ကိုညွန့် မောင်က ကျွန်တော့်ကို ပြောခပါရေ ။ အခုတော့ ကိုညွန့် မောင်ကလေး လီဖြတ် ပနာ လောကကို စွန့် ခွါလားခပါဗျန် ။ ကိုအောင်ကျော်လှမှာ မယိုင်စိန်ဖြူ အိမ်ထဲမှာ ထိုင်နီယင်း ပင်း နှလုံး ခုန်ရပ်ကာ သီလားခပါဗျန် ။ မယိုင် စိန်ဖြူမှာလေး သွီးတိုးရောဂါနင့် ဆရာဦးစောဖြူကို လောကအလယ်မှာ ထားပနာ ရှင်ကွဲကွဲလို့  လားခရပါ ဗျန် ။ ရှေ့နေ ဦးကံကြီးမောင်ကလေး အရက်နာကျလိ့  သီလားခပါဗျန် ။
ဒေပိုင်စွာထဲမှာ အခုဆိုကေ မင်းပြားမြို့ နယ် ပြည့်သူု့လွှတ်တော်ကိုယ်စားလှယ်တော်ကြီး ဖြိုက်နီရေ ဆရာဦးစောဖြူကတော့ခါ နီပြည်တော်မှာ ညီလာခံ တက်နီပါယင့်ဒေ။ ထိုတလောက ပထမ ညီလာခံ တက်ခကတ်တေအခါက ရန်ကုန်မရောက်ခင် ဆရာဦးစောဖြူ ခေါင်းမူးလို့  သတိတောင် မရလို့  ပြော သံကြား လိုက်ပါသိရေ ။ ယေဇူးနင့် အသက်အရွယ် ကြီးမြင့်နီရေ ဆရာဦးစောဖြူရို့  အသောက်အစား ကို လျှော့ပနာ မသီခင် တစိချေလောက် ရခိုင်ပြည့်အတွက် အလုပ်လုပ်ပီးစီချင်ပါရေ ဒေ။ ကျွန်တော့်မှာ နိုင်ငံရီးရဲဘော် ရဲဘက်ကိုညွန့့်မောင် မဟိရေအခါ နိုင်ငံရီးရဲဘော် ဖြိုက်တေ ဦးစောဖြူကိုပြောချင်ပါရေ ။ ကျွန်တော်ရို့ နိုင်ငံရီးစကား ပြောရေအခါ နားထောင်ခကတ်တေ ရှေ့နေဦးးကံကြီးမောင် ရို့  ဦးသိန်းထွန်းရို့  ဦးအောင်ကျော်လှ ရို့  မဟိရေအတွက် ဇါသူနားထောင်ကတ်ပါဖို့  သိလေးချင့် ။
ဝိုးတ၀ါးအရိပ်တိထဲမှာ မှုံနီရေ အလွမ်းပုံရိပ်တိကို ကျွန်တော် မိလို့  ဖျောက်လို့  မရနိုင်ပါဒေ ။
ဒေပိုင် အလွမ်းပုံရိပ်ထဲမှာကျွန်တော် ရို့  ရယ်လို့  ပျော်လို့  မိုးရီထဲမှာ ထီးဆောင်းလို့  လားနီခစွာတိကို ကောင်းကောင်းကြီး သတိရမိနီပါရေ ထော ။ ။။။။။။။။။
ခိုင်အောင်ကျော် ( နယူးယောက် )
