UNHCR Malaysia ၏ ကမ္ဘာဒုက္ခသည်များနိန့် ကို ကွာလာလမ်ပူမြို့မှာရှိရေ Brickfeild ရှိ KL Central ဘူတာမှာ အေနိစတင်ကျင်းပခပါရေ။ အယင်ကဆိုကေ အေပိုင်နိကို UNCHR ရုံးထဲမှာရာ ဒုက္ခသည်ရုံးတိကို ဖိတ်ကြားဗျာလ် ကျင်းပခကေလည်း အခုပိုင်လူစည်ကားရာ Public နေရာတွင်ကျင်းပစွာရေ ဒုတိယအကြိမ်မြောက်ပင်ဖြစ်ပါရေ။
ဒေဒုက္ခသည်နိအခမ်းအနားသို့ ရခိုင်ကိုယ်စားပြုအနိန်နန့် ရခိုင်ဒုက္ခသည်ကယ်ဆယ်ရေးကော်မတီ (ARRC)၊ တိုင်းရင်းသားအဖွဲ့ဒုက္ခသည်အဖွဲ့အစည်းတိ၊ တခြားနိုင်ငံက ဒုက္ခသည်အဖွဲ့အစည်းတိနှင့် မလေးရှားက စေတနာ့ဝန်ထမ်းတိလည်း တက်ရောက်ကတ်ပြီးကေ မိမိရို့၏ရိုးရာအကတိနန့် ကပြတင်ဆက်ခကတ်ပါရေ။
မလေးရှားနိုင်ငံရှိ ရခိုင်ဒုက္ခသည်တိကို ဦးဆောင်ကူညီပီးနိန်ရေ ရခိုင်ဒုက္ခသည် ကယ်ဆယ်ရေးကော်မတီ ( ARRC) ၏ တာဝန်ရှိသူကို ဆက်သွယ်မီးမြန်းရာ “ကျွန်တော်ရို့ ARRC က ကုန်ခရေနှစ်ကပိုင် အဆိုအကနန့် ဇွန်လ 18 ၊ 19 နှစ်ရက်ဆက်တိုက် ပါဝင်ဖို့ ရှိပါရေ။ အေနိခါ တေးခြင်းက ၀င်းကိုခိုင်၏ ရခိုင်သဘာဝတေးသံကို ကိုလင်းလင်း က သီဆိုပြီးကေ ARRC School မှ ကျောင်းသူချေတိက ရခိုင်ရိုးရာ အကနန့် တင်ဆက်ကပြကတ်ပါရေ။
အခမ်းအနားမှာ ဒုက္ခသည်ရို့၏ဘဝကို ဓာတ်ပုံတိနန့် ခင်းကျင်းပြသထားပြီးကေ ဒုက္ခသည်အဖွဲ့အစည်းတိကလည်း လက်မှုပစ္စည်းတိကို ခင်းကျင်းရောင်းချထားပါရေ။ UNHCR ကလည်း ဒုက္ခသည်တိ ရံပုံငွေအတွက် တီရှပ်အင်္ကျီတိကို ရောင်းချထားပြီးကေ ရောက်လာရေ မလေးရှားနိုင်ငံသားတိကို မလေးရှားရှိ ဒုက္ခသည်တိနန့် သက်ဆိုင်ရေမိန်းခွန်းတိကို မိန်းမြန်းဗနာ အဖြေမှန်ရေလူတိကို အမှတ်တရလက်ဆောင်တိ ပီးအပ်ခပါရေ။
အဂုပိုင်လူစည်ကားနိန်ရာမှာ ကျင်းပခြင်းရေ မလေးရှားရှိ ဒုက္ခသည်အခြေအနေကို ပိုမိုနားလည်စီဖို့နန့် ထိုသူရို့၏ အခက်အခဲတိကို မလေးရှားလူမျိုးတိနန့် အာဏာပိုင်တိ ရင်းနှီးသိရှိလာစီဖို့ရန် ဖြစ်ပါရေ။ ဇာကြောင့်ဆိုပါကေ မလေးရှားနိုင်ငံရေ ၁၉၅၇ ခုနှစ် ဒုက္ခသည်တိဆိုင်ရာ ပဋိညာဉ်စာချုပ်မှာ လက်မှတ်ရီးထိုးထားခြင်း မရှိရေအတွက်နန့် မလေးရှားရှိ ဒုက္ခသည်တိရေ မလေးအစိုးရ၏ ဖမ်းဆီးထိန်းသိမ်းခြင်းကို ခံနိန်ကတ်ရပြီးကေ အခက်အခဲမျိုးစုံနန့် ရင်ဆိုင်နိန်ကတ်ရရေအတွက် ဖြစ်ပါရေ။ အဂုအခါ UNHCR-Malaysia မှ ထုတ်ပြန်ထားသော အချက်အလက်တိအရ မလေးရှားနိုင်ငံမှာ ဒုက္ခသည်ပေါင်း ၉၀၀၀၀ ကျော် နိန်ထိုင်လျှက်ရှိရေလို့ သိရပါရေ။
