ရခိုင်ကာတွန်းဆရာ တယောက်က ပြုံးသိပြုံးသွင် ကာတွန်းစာအုပ်ထုတ်

      ရခိုင်ပြည်က စာရီးဆရာ အနုပိုင်ညာသည်တိ အဆိုကျော်တိ ရုပ်ရှင်မင်းသားတိကြားမှာ အခုတလောနာမည်ကြီးလာရေ အနုပိုင်ညာရှင်တယောက်ကို မျက်စိကျလာဖြစ်သည်။ သူဖြတ်သန်းလာစွာက တမူထူးသည်။ နဂိုရ်ကပင် ဗမာစာနာင့် မဂ္ဂဇင်းတိမှာ နာမည်ရ ရီးနိန်ကေလဲ သူတတ်တေ အနုပိုင်ညာက ကာတွန်းနာင့် ဆိုကေ မှားဖို့ မထင်။ အချေခါကပင် ကာတွန်းပိုင်ညာကို ဆွဲနိန်ခရေလို့  သိရသည်။ သူ့့ နာမည်ကား အမိအဖခေါ်စွာ နာမည်နာင့် ကျောင်းနာမည်ဆိုကေ ကိုဇေါ်ဝင်းဦးဖြစ်သည်။

          အဖက ကွယ်လွန်သူ ဦးမောင်ကျော်ဇံဖြစ်ပြီး အမိက ဒေါ်သိန်းသိန်းကျော်ဖြစ်သည်။ မွီးချင်းတအူတုံဆင်း ညီအကိုမောင်နှမ သုံးယောက်ထဲမှာ သားကြီးသြရသဖြစ်သည်။ အထက(၂) မှာ -၁၀-တန်းကို အောင်မြင်ပြီး အ၀ီးဝင်တက္ကသိုလ် စာပီးစာယူနာင့် ဘွဲ့ ရသူဖြစ်သည်။ -၁၉၉၉-ခုနှစ်က ၂၀၀၅-ခုနှစ်အထိ အာရှဓနဘဏ်မှာ အလုပ်လုပ်နိန်ခသည်။

         ၁၉၉၉-ခုနှစ်မှာ မူခင်းရှုထောင့်ဂျာနယ်မှာ တမျက်နှာကာတွန်း ပါလာစွာပင် စာပီလောကမှာ ကာတွန်းပိုင်ညာရှင်တယောက်အဖြစ် ကလောင်တလက်ကို စတင်ရရှိလားသူဖြစ်သည်။ ဇေါ်ဝင်းဦး၏ ကလောင်နာမည်ကား တက်သစ်အောင် ( စစ်တွေ ) ဖြစ်သည်။ ကာတွန်းဆရာ တက်သစ်အောင်(စစ်တွေ ) က အနုပိုင်ညာ တွေးခေါ်မူအားကောင်းသည်မှာ ကာတွန်းရီးဆွဲခြင်း တခုမဟုတ်။ ဆောင်းပါး၊၀တ္ထုတို၊ ကဗျာ တိကို အပါတ်စိုင် ဂျာနယ် မဂ္ဂဇင်းတိမှာ ရီးယင်းသားယင်း အနုပိုင်ညာလောကက ကြယ်တပွင့်အဖြစ် ရပ်တည်လာနိုင်သူဖြစ်သည်။ သောင်းပြောင်းထွေလာ ရယ်စရာ ၊ မူခင်းစုံ၊ ရတနာပန်းခင်းရုပ်စုံ၊ ဓမ္မပဒေသာ၊ ၀ံသရက္ခိတ၊ တေဇ၊ မိုးသောက်ပန်း၊ 6-days news ၊ လခြမ်းမြီ၊ ကစ္စပ၊ မုနိမြီ၊ မေဃ၀တီ၊ ဦးဂါ မဂ္ဂဇင်းတိမှာ ကာတွန်းတိကို ရီးဆွဲနိန်သူဖြစ်သည်။ တက်သစ်အောင် (စစ်တွေ ) ၏ ကာတွန်းတမျက်နှာ ဇါတ်ကောင်မှာ ဘုတ်ဖါးချေ ဟူ၏ ။ သူ့ ဇတ်လိုက် ဘုတ်ဖါးချေနှင့် ကာတွန်း အတိုအရှည် (၁၂) ပုဒ်ကို ဖေါ်ပြပြီးဗျန်လို့  သိရသည်။
    

    တက်သစ်အောင်( စစ်တွေ )မှာ စစ်တွေစာပီအဖွဲ့ အမှတ်( ၇၀၁၆ ) ဖြစ်သည်။ ပန်းခိုင်ခိုင် -စာအုပ်ဆိုင်ကို အိမ်မှာ ဖွင့်လှစ်ထားသည်။ သူ့ အိမ်က အမှတ်( ၇၅ ) ငပိန်လမ်း-ဘောက်သီးစုဖြစ်သည်။ ဆိုရလျင် ကာတွန်းဆရာ တက်သစ်အောင် ( စစ်တွေ ) မှာ အခြားလူတိပိုင် စာရီးကဗျာရီး ၀တ္ထုရီးနာင့် သမိုင်းစာပီ သုတေသနလုပ်ယင်းနာင့် ရခိုင်စာပီလောကမှာ ရပ်တည်နိန်သူ မဟုတ်။ ရခိုင်အနုပိုင်ညာရှင်တဦးအနိန်နာင့် ရခိုင်စာပီလောကကို ထိုးဖေါက်လိုက်စွာက ကာတွန်းနာင့်ထိုးဖေါက်လိုက်ခြင်းပင်ဖြစ်သည်။ ဒေနိန်ရာမှာ ကာတွန်းပိုင်ညာရှင်တိအနိန်နာင့် ပါတ်သက်လို့  တချိန်က နာမည်ကြီးခရေ ရခိုင်သားကာတွန်းဆရာတိကို သတိထားမိသည်။ အယင်က နာမည်ကြီး ရခိုင်လူမျိုး ကာတွန်းဆရာတိ ဟိန့် ခကတ်သည်။ နိုင်ငံတော်လေးဝ ဆိုစွာက စစ်တွေမြို့  ဦးရဲကျော်သူကျောင်းရှေ့မှ ဖြစ်သည်။ 

          ယေကေလဲ သူက ဗမာကာတွန်း သရုပ်ဖေါ်စာပီမျိုးနာင့် သက်မွီးဝမ်းကျောင်းယင်း ရန်ကုန်မှာ အန်ိန်များခသူဖြစ်သည်။ ဦးနုခေတ်တွင် ရုရှားနိုင်ငံကို လားခါနီး     ပြသနာတက်ဗြီး မလားခရသော ကာတွန်းဆရာတယောက်ဖြစ်သည်။ သူကလည်းထူးသည့်သူဖြစ်သည်။ ရခိုင်လူမျိုးတိက လေးရပ်ဝတီ လခြမ်းမြီ လို့ ဆိုသည်ကို မပြည့်မစုံနာင့် ကာတွန်းဆရာပီပီ လေးဝ-လို့  သူ့ ကလောင်နာမည်ကို သရော်ယင်း ထားခသည်။ နိုင်ငံတော်လေးဝမှာ နိုင်ငံရီးလောကနှင့် မကင်းသူဖြစ်သောကြောင့် သူနှင့်နိုင်ငံရီး ထောင်ကျ စာရီးဆရာ ကဗျာဆရာတို့  မှာ သူ့ ခေတ်သူ့ အခါနှင့်ဆိုလျှင် နာမည်ကြီးသူတယောက်ဖြစ်ခသည်။

          ကာတွန်းသန်းထွန်းမှာမူ စစ်တွေမြို့  သဇင်စားသောက်ဆိုင် ဖွင့်ခသော လမ်းမကြီးမှ ကွယ်လွန်လားခသူ နိုင်ငံရီးသမားကြီး ဦးညွန့် မောင်နှင့် ညီအကိုဝမ်းကွဲဖြစ်သည်။      ယခုRFA   ရေဒီိယိုအသံလွှင့်ဌါနမှာ       သတင်းလွှင့်နိန်သူ နေရိန်ကျော်၏ ၀ရီးဖြစ်သည်။ ကာတွန်းသန်းထွန်းမှာ ရခိုင်လူမျိုးဖြစ်ကေလဲ ဗမာလီသံနှင့် ရီးဆွဲရေ ကာတွန်းဆရာ တယောက်ဖြစ်သည် ။ သူလည်း ကာတွန်းဆရာထဲတွင် နာမည်ကြီး ကာတွန်းဆရာဖြစ်သည်။
 

       ကာတွန်းသန်းထွန်းရို့ နာင့် တခေတ်ထဲ နာမည်ရလာသူမှာ ကာတွန်းလှကျော်စိန်ဖြစ်သည်။ ကာတွန်းလှကျော်စိန်မှာ စာရီးဆရာမြအောင်နိုင် နာမည်နာင့် ၀တ္ထုစာအုပ်လုံးချင်း ထုတ်ဝီခသူဖြစ်သည်။ အခုတော့ ရှေ့နေလုပ်ယင်းပင်း စစ်တွေမြို့ မှာပင် အသက်မွီးဝမ်းကျောင်းနိန်သူဖြစ်သည်။ ကာတွန်းလှကျော်စိန်နာမည်နာင့် မဂ္ဂဇင်းတိမှာ နမည်ရလာဗြီးမှ နောက်ပိုင်းတွင် ကာတွန်းဆွဲအား နည်းလာသူဖြစ်သည်။ အခုဆိုကေ ကာတွန်းတောင် မဆွဲဗျန်လို့  သိရသည်။ ထွန်းထွန်းပေါက်ပေါက်နာင့် ကာတွန်းဆွဲစွာမှာ ရခိုင်စကားနှင့် ရီးဆွဲလာသူမှာ ကာတွန်းတက်သစ်အောင်(စစ်တွေ )   ဖြစ်သည်။ တခြားကာတွန်းဆရာကြီးတိက ကာတွန်းလောကက ထွက်ခွာလားချိန်မှာ တက်သစ်အောင်(စစ်တွေ) က ခုံခုံမင်မင်နာင့် ကာတွန်းကို ရီးဆွဲလာခြင်းပင်ဖြစ်သည်။ တိတိကျကျ ပြောရဖို့ ဆိုကေ ကာတွန်းဆရာတိမှာ ရခိုင်စာပီလောကက အရီးမစိုက်တေ အနုပိုင်ညာသည်တိဖြစ်သည် ။ ထွက်လီသမျှ ရခို်င်ပြည်က မြို့ နယ်အလိုက် မဂ္ဂဇင်းတိကို လှန်လောကြည့်မိဖြစ်သည်။ မဂ္ဂဇင်းစာအုပ်-၁၀-အုပ်လောက်မှာ တကွက်ပြ ကာတွန်းနာင့် ဖေါ်ပြထားရေ စာအုပ်တအုပ်ကိုရာ တွိရသည်။ စိတ်မကောင်းပါ ။ ကျွန်တော်ဆက်လို့  မကြည့်ချင်ပါဗျန်ကာ။ ရန်ကုန်ထုတ်မဂ္ဂဇင်းတိမှာ ကာတွန်းဆရာတိဆိုကေ ရှေ့ဆုံးစာမျက်နှာမှာ နိန်ရာပီး ဖေါ်ပြခြင်းခံရသည်။ ကာတွန်းဗြီးမှ ကဗျာတိကို ဖေါ်ပြတတ်သည်။ ကာတွန်းဆရာ နာမည်ကြီးတိပါလာမှ ယင်းမဂ္ဂဇင်းတိမှာ စာဖတ်ပရိတ်သတ်တိကို ဆွဲဆောင်အားကောင်းသည်။ ယင်းအချက်ကို ကျွန်တော်ရို့  ရခိုင်စာပီလောက က ဇါဖြစ်လို့  မသိရအောင် နိန်လီပါလဲမသိ။
 

        စကားပြောရေအရုပ်တိလို့  စာပီလောကမှာ တခန့် တနား နာမည်ကြီးရေ ကာတွန်းတိမှာ များသောအားဖြင့် ခေတ်ကို သရော်ထားရေ ကာတွန်းတိရာဖြစ်သည်။ စာတလုံးထဲနာင့် ခေတ်အဆက်ဆက် အစိုးရတိကို ၀ီဖန်စွာမှာ ပြောင်မြောက်လွန်းသည်။ တခါက အိန္ဒိယနိုင်ငံမှာ နိန်ထိုင်ခစိုင် ကာတွန်းတပုဒ်ကို အခုထိ သတိရမိသည်။ ယင်းမှာ တရားရုံးတခုမြင်ကွင်းကို ပြထားသည်။ တရားသူကြီးနာင့် ၀က်ခြံမှာ အမူစစ်ဆီးနိန်ရေပုံကို     ပြထားသည် ။ နောက်တပုံမှာ အနှစ်-၂၀- ကျော်လာရေအခါ ယင်း ပုံပြကွက်ကို     ပြထားသည်။     လူက နည်းနည်း အိုလာရေပုံ ဖြစ်နိန်သည်။ နောက်တပုံမှာ လူအိုကြီးတယောက်က ၀က်ခြံမှာ အမူကို ရင်ဆိုင်ဖြီရှင်းနိန်ရဆဲ ပုံဖြစ်သည်။ 

      ယင်းကာတွန်းသုံးပုံမှာ လူတယောက်ထဲကို နှစ်အပိုင်းအလိုက် ပြထားစွာကို မြင်ရသည်။ သဘောက အိန္ဒိယနိုင်ငံ၏ တရားစီရင်ရီးစနစ်မှာ ဆင်းရဲသားလူတန်းစားအတွက် တခါချေလဲ မဗြီးဆုံးဘဲ ဆံပင်ဖြူ သွားကျိုးအထိ အမူကို ရင်ဆိုင်နိန်ရကြောင်း ပြထားရေ ကာတွန်းဖြစ်နိန်သည်။ ယင်းကာတွန်းကြောင့် တရားရုံးတိ လှုပ်လှုပ်ခါပနာ ပြသနာ ဖြစ်လားခကတ်တေအကြောင်း နောက်တရက်ထုတ် သတင်းစာမှာ ဖတ်ရဖူးပါသည်။ ကာတွန်းဆရာတိမှာ     ခေတ်ကိုသရော်သော အကောင်းဆုံး စကားပြောရေအရုပ်ကို ရီးပြရေ အနုပိုင်ညာရှင်တိဖြစ်သည်။    ယေကေလဲ ယင်းကာတွန်းဆရာတိမှာ စာပီလောကမှာ သက်မွီးဝမ်းကျောင်းဖို့  ထိုက်သင့်ရေ ခံစားမူ စာမူခတိကို မရရှိတတ်တေ စာမူခနှင့် မရပ်တည်နိုင်ကေလဲ ကာတွန်းကို စွဲစွဲမက်မက်နာင့် ဆွဲရေ သူထဲမှာ တက်သစ်အောင်( စစ်တွေ ) ပင်ဖြစ်တေလို့  ဆိုရဖို့  ထင်သည်။

       အခု သူရီးဆွဲထားရေ သူ့ ဇတ်လိုက် ဘုတ်ဖါးချေနာင့် ကာတွန်းစာအုပ် တအုပ်ကို ထုတ်ဝီလိုက်ဗျန်ဖြစ်သည်။ ကာတွန်းဆရာတိမှာ သူရို့  မွီးဖွါးပီးလိုက်တေ ဇါတ်လိုက်ကျော်နာင့်စီ တွဲပနာ နာမည်ကြီးသူဖြစ်သည်။ ဘုတ်ဖါးချေအဖ တက်သစ်အောင်(စစ်တွေ ) မှာ ရခိုင်စကားပြောကာတွန်းကို စာအုပ်တအုပ်အဖြစ် ထုတ်လိုက်ကေလဲ ရခိုင်ပြည်က ထုတ်တေ မဂ္ဂဇင်းတိမှာတော့ ကာတွန်းတမျက်နှာချေပါဖို့  စွာကိုပင် မနည်းကြိုးစားရဖို့ လို့ ထင်သည်။ ဆိုကေ ဘုတ်ဖါးချေ သရော်နိုင်ဖို့  လား ။ အကြောင်းမှာ ရခိုင်ပြည်နယ်ထုတ်မြို့ နယ်လိုက် မဂ္ဂဇင်းမှာ ကာတွန်းဆရာရို့ ပြောရေ စကားကို သရော်လို့  ပြောထားရေ စကားကို ပြောထားကေလဲ ပြောထားမှန်းမသိ ရှက်ကြောက်ရမှန်းမသိလို့  ထင်မိသည်သာလို့        ပြောချင်ယင်း တက်သစ်အောင် (စစ်တွေ ) က ရခိုင်လူမျိုးတိကို ဘုတ်ဖါးချေက ကောင်းကောင်းကြီး သရော်နိုင်ပါစီလို့  ပြောချင်တိုက်တွန်းချင်ပါသည်။ တက်သစ်အောင်( စစ်တွေ ) ၏ ကာတွန်းတခုမှာ ဒေပိုင် ရီးထား သရော်ထားစွာကို အကြိုက်ဆုံးပါလို့့ နာမည်ကြီးအဆိုတော် တယောက်က အခုပိုင် သူ့ ကာတွန်းကို ပြောပြသည်။
ကာတွန်းခေါင်းစိုင်မှာ မန်ကျည်းဖျော်ရည်
ဒေါသထွက်နိန်ရေ မှင်းကျိုးသီးနှာင့် အရုပ်ဆွဲထားရေ ကာတွန်းပုံက စကားပြောလိုက်ပုံမှာ
" ရခိုင်သားဖြစ်ဗြီးကေ ငါ့နာမည်ကိုတောင် မသိကတ်။ ငါ့နာမည် မှင်းကျိုးသီးဝေး- မှင်းကျိုးသီး "

ဒေပိုင်ကာတွန်းကို ဖတ်ဗြီးစွာနာင့် ဘ၀မိန့် နိန်ကတ်တေ ရခိုင်လူမျိုးတိ ၊ ဗမာစကားကို ပြောနိန်ကတ်တေ ရခိုင်လူမျိုးတိကို          ပြုံးသိပြုံးသွင်                  ဖြစ်လားပါရေထော-           အော် - ဟုတ်ပါယင့် - သူ့ စာအုပ်နာမည်က ပြုံးသိပြုံးသွင်ပါလတ်။

ခိုင်အောင်ကျော်(နယူးယောက်)